JSJ FitPro MMA & Fitness center chuan Kum 2015 December ni 8 ațanga ni 12 chhungin Mixed Martial Arts leh Muay Thai Boran seminar hlawhtling takin a buatsaih. Seminar-ah hian MMA National working committee member leh North East India MMA Chief Delegate Tv. Samuel Lalrozâma Hmar chu resource person a ni. Ani hi Muay Thai Boran lamah National Technical Director a ni bawk.
He event hi Mizoram chhung district pathum – Aizawl, Lunglei leh Kolasib ațangin an chhim a. Mizoram pâwn ațangin Meghalaya leh Assam an rawn tel bawk. Seminar khar ni hian JSJ neitu Dr. Joel-a u Dr. Jeremy Pautu chuan a telpui a, certificate semna hun neih a ni. He event hi North East India Mixed Martial Arts Association leh Muay Boran Association of India-in a support a ni.
NEIMA hi India rama MMA pawl hlun leh lian ber, sorkar laipui support ni bawk AIMMAA hnuaia din a ni. Seminar hi Chhinga Veng Comminty Hall, Aizawl-ah neih a ni a, tunlai khawvela UFC leh promotional company dangten an tihlar mek, sport țhang chak berte zîng ami ni mêk-MMA tihlar nana tih a ni.
He event closing ceremony-ah hian free fight sparring session neih a ni bawk a, chu hun chu nakkum January-a AIMMAA National MMA tournament Mumbai-a awm tur atana thlanna hun atana hman a ni. International referee Tv. Samuel Lalrozama chuan practical referee & judge training course a pe naghal bawk. JSJ chuan he event lo awm turah hian mi 5 sponsor a tum a, tin, nakkum February ațang hian Mizoram chhung ngeiah MMA league lian tak neih chhoh a tum bawk a ni.
Chuta hman tur MMA cage lian tha tak pawh Mumbai-ah order a ni tawh a, an rawn thawn mek a ni. He seminar-ah hian NEIMA senior vice president Biswajit Sarkar chu a rawn tel ve a, ani bakah North East ațanga official lo kal te chu Subhajit Acharjee, Sagnick Gupta, Bipon Modak, Palash Hazarik leh Cores Marwein te an ni. Mizoram lam ațangin official Deng Thanchhunga, Zorammawia, Ngurlianzuala Sailo, Michael Ruatfela Ralte leh Official doctor Dr. Chhana te an tel.
MMA national commissioner Daniel Isaac bul tumnaa siam, kum 18 hnuai lamten MMA an fight ve theihna tura dan siam- Sport MMA (Semi leh light contact) chu introduce a ni bawk. Hei bakah hian Thailand sorkar leh National body hriatpuiin Muay Thai Boran grading exam neih a ni bawk a, he exam neihtir thei Tv. Samuela chuan a conduct bawk.
JSJ FitPro gym hi Mizoram State MMA Association (MISMA) headquarters gym a ni a, Aizawl Khatla kawnah a awm a, Mizo țhalaite tana theih tawp chhuah a tum zel a ni. SFL, ONE championship leh UFC te thlenga la invawrh chhuah theih an beisei thu a sawi. Dec ni 12 zan dar 9-ah meeting neih zui a ni a, chutah chuan North East level-a kan naute hi JSJ FitPRo kal tlanga theih ang tawpa hma lakpui tum a nih thu rel a ni.