12 Jun 2019 07:47

inkhel

North East Futsal League Club tlangzarh a ni

August ni 23, 2019 atanga September ni 4, 2019 chhunga khelh tur Northeast Futsal League chu June ni 12, Nilaini khan Vivanta Taj Hotel-ah tlangzarh a ni.

Northeast India-a Mega Futsal league hmasa ber ni tur Northeast Futsal League-ah hian Northeast state hrang hrang, heng: Assam, Arunachal Pradesh, Nagaland, Meghalaya, Manipur leh Mizoram te hian team khat theuh an nei dawn a ni.

He league season hmasa ber hi Guwahati khawpuiin a thleng dawn a, inkhel hi Live-in TV leh Youtube lamahte a en theih dawn a ni.

He league-a club tinte hian foreign/international player pahnih theuh an nei dawn a, squad-a player dangte erawh state chhung mi (home grown players) vek an ni thung ang.

MIZORAM AIAWH TUR 'MIZO FALCONS'

He league hi ISL leh Premier Futsal kalpui dan anga kalpui tur a nih avangin franchise fee pea Mizoram aiawh tur club pawh hi lei a ni. Mizoram aiawh tur Mizo Falcons hi he league khel tur liau liau a din a ni. Mizo Falcons hian champion hmasa ber nih ngei tumin hma a la dawn a, June thla tawp emaw July thla tir lam khian players trial a nei nghal dawn a ni.

State tinah club tinten League aiawhte telpuina hnuaiah press conference leh trial an kalpui leh dawn a, he press conference-ah hian trial neih hun tur sawi chian a ni dawn a ni.

He league hi 'Prolivity Sports and Recreation Pvt. Ltd.' buatsaih tur niin northeast huap sports league lian leh sum tamna ber tura ngaih a ni.

Vawiin (nilaini) tlaia League leh club launch-na program-ah hian League official website tlangzarh nghal a ni a, club tin aiawhte interview neih nghal bawk a ni. Mizo Falcons aiawh hian club B.O.G Tv. Lalnunpuia Khiangte a tel a ni.

Mizo Falcons futsal club owner Dustin Lalkulhpuia chuan Mizo mipuite thlawpna leh thawhpuina ngenin, "Mizo hnam club a nih angin Mizo hnam tan kan thawk chhuak dawn a ni. Hei vang hian Mizo mipui hmun hrang hranga awmte puihna leh thlawpna kan mamawh dawn a, a bikin league khelhna hmuna awm Mizote puihna kan mamawh tam lehzual dawn a ni," tiin a sawi.

Tin, he league-ah hian AMF leh FIFA dante hman kawp a ni dawn a ni.