Hero I-League khelh mekah March ni 4, Thawhtanni khan Aizawl FC chuan 4-1 in North East atanga I-League club kan neih hmasak ber Shillong Lajong chu Rajiv Gandhi Stadium, mualpuiah an hneh a, point 3 hlutak an hlawh chhuak.

Aizawl FC tan Ghanefo Ansumana Kromah chuan goal hnih a khung a, Lalkhawpuimawia leh Isak Vanlalruatfela chuan goal khat ve ve an khung. Shillong Lajong FC tan Donboklang Lyngdoh chuan goal khat a khung ve bawk.

Aizawl FC hian an match hnuhnungberah coach bang ta Gift Raikhan a enkawl Gokulam Kerala chu 3-1 in an khelmualah an zu hneh a, relegation zone atanga an chhuah tawh. Match 19 khel tawhin point 21 an nei mek a, table-ah pariatna an hauh mek.

Aizawl FC 4 - 1 Shillong Lajong FC

(Ghanefo Ansumana Kromah 40', 83'; Lalkhawpuimawia 81'; Isak Vanlalruatfela 89') (Donboklang Lyngdoh 90+3')

Goal lut te hi first half leh second half-a lut an ni a, first half-ah goal khat a lut a, second half-ah goal thum a lut thung. Goal lut hmasa ber first half huntawp dawn minute 5 ala awmin Aizawl FC tan Liberian forward Kromah chuan penalty a hlawh chhuah chu goal-ah chantirin an hmahruaina a khung a, goal luh belh lo in Aizawl FC chuan 1-0 a hmahruaiin chawlhlawk an hmang.

Second half-ah Aizawl FC chuan inkhel thunnun zawk mahse goal erawh an thun belh mai thei lo. Goal lut awm tawh lo in huntawp an hmang zo dawn emaw tih hnu huntawp dawn minute 8 chhungin Aizawl FC chuan goal thum zet an khung. Minute 81-ah midfielder Isak-a thawhrah sengin bench a tang a lut Lalkhawpuimawia chuan an goal hnihna mawi takin a khung a, Minute 2 aral leh hmain Kromah chuan Shillong Lajong tlarhnung chetsual zarah an goal thumna a khung leh a, minute 6 aral leh hmain Lalkhawpuimawia ball pek fing zet chu Isak-a chuan duh thala pet tura a insiam rem hnuah Lajong defender te karah chiang zetin an goal li na a khung ve leh bawk.

Shillong Lajong chuan goal khung ngei tumin counter attack-in annawr let a, huntawp dawn injury time-ah Aizawl FC defender te inthlah dul vangin Shillong Lajong substitute Donboklang Lyngdoh chuan a goal khatna khung mahse an siphurh sut turin hunin a daih tawh lo a, Aizawl FC chuan 4-1 in hnehna an chang ta a ni.

(adsbygoogle = window.adsbygoogle || []).push({});