13 Feb 2020 01:31

bakteaJr.

Mizo tlangval

​Nipuia Dortmund chhuahsan tur Sancho

English rawlthar duhawm Jadon Sancho chuan kumin nipuiah hian a khelh mekna Borussia Dortmund chu a chhuahsan dawn tih Germany lama Sky chuan a tarlang.

Sancho hi tunlai rawlthar zinga ‘luck’ ber pawl a ni a, Europe-a team liante duh rawn niin, team hrawl tak tak te nen sawizawm ni fo mahse tun season chu Dortmund-ah a awm tluan dawn.

Thlaleha kum 20 tling tur Sancho hian kum 2017 khan Manchester City atangin Dortmund hi a zawma, Dortmund player pawimawh ni chho nghalin, tunlai rawlthar zinga lar ber pawl a ni.

Germany lama Sky reporter Jesco von Eichmann-a’n Sancho-a chungchang Sky Sports a hrilh danin, “Tun nipui lo awm turah hian Dortmund a chhuahsan dawn chianga, mahse a club zawm tur erawh a la chiang lo.

“Ka hriat chinah chuan Manchester United chu a mah duh tu zinga mi an ni. Dortmund director Michael Zorc chuan kar liamta khan Jadon Sancho-a chungchangah dawrtu an neih loh thu a sawia, mahse vawiina ka zawh leh kha chuan a nui ringawt.

“Sancho dawrtu hi an awm ngei dawna, hma a sawn zela, season chawhma tawp lam khan chau viau mahse tunah erawh a fit tha in a khel tha leh em em tawha, a mizia pawhin hma a sawn hle. A huna thlen hi a harsata, nitin deuh thaw hian a tlai thina, mahse tunah chuan a danglam tawha, hma a sawn tawh.

“Training-ah a thawkrim em em a, hemi avang hian Dortmund manager Lucien Favre pawh a chungah a lawm. Winter break lai khan a inenlet ve nasa a nih ka ringa, tunah chuan a hma nen danglam tak a ni tawh a ni,” a ti.