Chelsea leh Ajax-te chuan a thuphungin Hakim Ziyech-a chungchangah pound maktaduai 38-in (euro maktaduai 45) inremna an nei tih chanchinbu mite chuan an tarlang.

Chelsea leh Ajax-te official pawhin an inrem thuai a rinawm thu Sky Sports chuan a tarlanga, Ziyech hian kumin nipuiah Chelsea a zawm ngei dawnin a lang chho mek.

Kum 26 mi Ziyech chu Chelsea manager Frank Lampard chuan thla hmasaa thlasik bazar inhawn chhung khan lak luh a lo tum tawh niin chanchinbu mite chuan an tarlanga, mahse Ajax hian Ziyech chu tun season chhung kawl tluan an duh avangin club hnihte inkarah inremna a awm thei ta lo niin tarlan a ni.

Euro maktaduai 45-in Chelsea leh Ajax-te an inrem tih hi Dutch chanchinbu lar tak De Telegraaf chuan a tarlang hmasa bera, anmahni hnu hian Europe-a chanchinbu lar tak tak te chuan club hnihte inkarah a thuphunga inremna a awm thu hi an tarlang zui ve nghala, thudik a nih ngei a rinawm hle.

Moroccan player Ziyech hi right wing lamah khel ber mahse no. 10 ang pawhin a khel theia, tunah hian Ajax-ah kum 2022 thleng contract a la nei.

Ziyech hian kum 2016 khan Twente atang Ajax hi a pana, tunah hian Ajax player pawimawh niin, Dutch champions tan hian tun season-ah game 29 khel tawhin goal 8 a khung tawha, assist 21 lai a nei tawh bawk a ni.