13 Feb 2020 11:38

bakteaJr.

Mizo tlangval

​Nipuia Chelsea player ni tur Hakim Ziyech

Chelsea chuan kumin nipuiah Ajax atangin Hakim Ziyech an la lut ngei dawn niin a langa, Chelsea leh Ajax-te chuan Moroccan forward chungchangah hian inremna an nei tawh tih an puang.

Chelsea chuan kum 26 mi hi mimal thilah inremna an neihpui leh thuai pawh a rinawma, season thar atangin Chelsea player a ni ngei dawn niin a ngaih theih tawh.

Chelsea manager Frank Lampard chuan thla hmasa khan Ziyech hi lak luh lo tum mahse Ajax hian tun season chhung Ziyech kawl an duh avangin club hnihte inkarah inremna a awm thei lova, tunah erawh nipui atan club hnihte an inrem.

Ajax hian Ziyech-a man hi pound maktadua 33 (euro maktaduai 40) a nih thu an tarlanga, a man hi pound maktaduai 4 velin a la pun belh thei dawn nia tarlan a ni.

Ziyech hi veikhawr niin right wing lamah leh no.10 angin a khel theiam ve ve a, chance siam chhuah lamah a thawhhlawkin, player tangkai tak leh creative tak a ni a, Chelsea player mamawh tak niin a lang.

Ziyech hi Netherlands-a piang a ni a, Dutch club Heerenveen-ah a career bul a tana, amah hi Netherlands-a piang ni mahse Moroccan niin, Netherlands U19, U20 leh U21 tante khel mahse senior team lamah erawh Morocco tan a khelh thung.

Eredivisie-ah Ziyech hi season li ngawt top assist provider a ni tawha, tum hnih Ajax Player of the Year-a thlan ni tawhin, Dutch Footballer of the Year-ah kum 2018 khan thlan a lo ni tawh bawk.

Season kal mekah Ajax tan competition zawng zawngah Ziyech hian game 30 khelh tawhin assist 21 a nei tawha, goal 8 a khung tawh bawka, Ajax hi league table lerah an awm mek bawk a ni.