Paul Pogba chuan a teammate te hnenah nipui huna Old Trafford chhuahsan a duh thu a sawi a, Pogba hian chhuah a tum a nih phawt chuan Manchester United chuan dan beh an tum lo niin thu a thang mek.
Manchester United midfielder Paul Pogba hi Spanish club lian Real Madrid nen an sawi zawm nasa chho hle a, nipui transfer window inhawn hunah Zinedine Zidane chuan Pogba hi lak luh a tum maithei niin an sawi hlawm a. Hetiang thu thang karah hian Pogba pawhin Spain lam pan a hreh lo tih hi a lantir chho tan a ni.
Tun season-ah Manchester United chuan beisei an pha vak lo hle a, Jose Mourinho chu nikum December thla khan an ban a, a aiawh turin Ole Gunnar Solskjaer an ruai zui a. Tun hnaiah an che fuh thei meuh lo a, Premier League club chungnung pali zinga tel thei lo dinhmunah an ding mek a. Season tharah UEFA Champions League an khel pha dawn lo a nih chuan Pogba hian a khelhna club thlak hi a tum ngheh a rinawm hle.
Zinedine Zidane chuan Real Madrid a enkawl nawn leh hnuah tan lak chhoh a tum hle a, season thar atan nasa taka player siksawi a tum a. France midfielder Pogba chu Galactico thar atana a hual zingah a dah hma hle a, player leina tur pawisa a nei hnem dawn bawk a, Pogba hi a duh tak tak a nih chuan a lak theih ngei a rinawm a ni.
Italian champion Juventus pawhin Pogba hi koh kir leh an hreh lo viau niin an sawi a; mahse, kum 26-a upa midfielder hian Real Madrid zawm a, Zinedine Zidane hnuaia khelh tluka chak a neih loh thu a sawi a ni.
Tun season-ah Pogba chu beisei pha lo tiin an sawisel nasa hle a, Pathiannia 0-4 ngawta Everton laka an tlawm chhan pawh kha player te vang a ni tih a pawm thu amah hian a sawi chhuak nghe nghe a. Champions League game khel hnem thei nih a duh a, hetiang tur hian Bernabeu lama Zidane-a hnuaia khelh theih chu a duh ta ber a ni.
2015-16 season-ah khan Zidane chu Italy ramah a kal a, Pogba chu Madrid khawpuia kal turin a bia a. Anni pahnih an inrem vek tawh hnu hian Real Madrid president Florentino Perez leh Pogba agent Mino Raiola te inkar boruak fuh loh vangin Pogba hian Real Madrid a zawm ta lo a ni.
Pogba chuan, “Tun hnaiah kan che chhe thei viau mai a, hei hi tu dang vang ni loin player te vang hi a ni chiang a. Kan rilru put dan a dik lo a, khelmuala kan chet dan a dik hek lo a, kei ngei pawh hi ka dik lo tih ka pha lo. Keimahni kan inti zahawm lo mai pawh ni loin, club leh fans te lakah zahawmin kan awm lo a ni,” a ti.
“Kan inkhelh zawhah manager chu dressing room-ah a tawng chhuak a, staff te an tawng chhuak bawk a, an thil sawi chu thudik a ni vek hlawm a. Kan inkhelh dan vel an sawi a, engmah phuah belh an nei ngai lo a, chuti chung chuan kan insiamtha thei chuang si lo. Hetiang reng a nih chuan kan tan awmzia a awm lo a, hmasawn tumna hi a awm lo niin a ngaih theih,” a ti bawk.
A sawi zelnaah, “Tun aia hmasawn belh zel hi ka duh dan a ni a, chutiang chuan kan awm miau si lo a, hmun dang pan mai hi ka hreh tawh hauh lo a. Season tharah chuan hmun danga khelh hi ka duh tawh a, Champions League khelh theihna club pan hi ka duh dan chu a ni,” a ti.
Hetiang thawm a awm takah chuan Manchester United pawhin Pogba chu a chhuak tak tak dawn a nih pawhin dan buai an tum loh thu an sawi zui nghal a ni.