14 Jan 2020 11:48

bakteaJr.

Mizo tlangval

​Niminah bawng ka kai, vawiinah Barca ka enkawl: Setien

Barcelona manager thar Quique Setien chuan Barcelona manager a ni ta mai chu awih har a ti a, a mang ramah pawh a man phak loh hna a chelh ta niin a insawi.

Barcelona chuan tunkar tir khan manager Ernesto Valverde an bana, Valverde thlak tur hian Real Betis manager hlui Setien hi an lalut chhunzawm nghala, kum hnih leh a chanve daih contract an ziahpui.

Kum 61 mi Setien hian Barcelona manager a nih hnuah a vawi khat nan press mite a hmachhawna, press mite hnenah chuan a hma ni lawka bawng a kaih thu a sawi. Setien chuan, “Heti ang chance tha tak min pek avangin Barcelona hnenah hian lawm thu ka sawia, ka mang ramah heti ang hi chu ka mang pha lo.

“Club hnenah lawmthu ka sawi mawlh mawlha, he chona hi ka hmachhawn chak tawh hle. Nimin mai khan ka in bul velah bawng ka kaia, tunah erawh Barcelona manager ka ni a, khawvela player tha ber te ka enkawl a ni,” a ti.

Setien hian La Liga-ah Las Palmas chu 11-na a lo nihpui tawha, hei hi La Liga-ah kum 40 hnua Las Palmas nih san ber tum a ni a, Real Betis chu a season hmasa berah parukna nihpuiin Europa League khel turin a tlinpui bawka, hei hi kum 2005 hnua Real Betis nih san ber tum a ni.

Season liamta khan Betis chu Barca, Real Madrid leh Atletico Madrid lakah-te hnehna chanpui mahse ban a ni zui ta tho va, May thla khan Betis chhuahsanin kum chanve vel club nei lova a awm hnuah Barcelona hian an ruai ta a ni.