07 May 2019 05:48

inkhel

Nikum aiin kan ziaawm zawk: Valentino Rossi

Valentino Rossi chuan tun season-ah thawm a la nei lian rih lo hle a, an intlansiak hnuhnun ber Jerez-ah 13-na atanga bul tanin parukna a ni thei a. Kum dangah chuan he circuit hi an team chuan an bike that tawk lohna tilangtuah an ngai thin a ni.

Pathiannia a result avangin Valentino Rossi chu a lunghnur chuang lo a, kum hlui ai chuan kuminah hma an sawn zawk niin a sawi.

Rossi chuan, “Nikum ai chuan kuminah kan zia zawk a, kan bike pawh a chak tha tawh zawk a. Kawng a la thui a, inelna tur a la tam hle a, tuna kan kawng zawh tawh chinah chuan kan che chhe hran lo khawp mai,” a ti.

“Kan zia e ka tih avang hian ka lung a awi vek tihna erawh a ni chuang lo a. Jerez hi intlansiak harsatna hmun a ni a, chuti chung chuan podium-a lawn thei tura beihpui thlak thei kan nih rualin a tawp lamah ka muang ta a ni,” a ti bawk.

A sawi zelnaah, “Hmabak kan neihah theihtawp ka chhuah zel dawn a, hmahruaitu ni thei dinhmunah ka la ding ve zel bawk a. Tuna harsatna lian ber zawk chu Honda rider Marc Marquez hi a ni a, a hma zawng aiin a tlan chak tawh lehzual a, intlansiak laiin a tlu te a nih ngawt loh chuan lehpelh ngaihna a awm meuh lo a ni,” a ti.

“Kan dinhmun thlirin um phak theih loh tawp chu a ni chuang lo a, tunah point 9 chauhin kan la hniam zawk a. Alex Rins pawh hi a chak khawp mai a, Andrea Dovisioso pawh dah hniam chi a ni miah lo bawk a. Podium lawn thei nih kan inchuh chho tak tak dawn a, kei pawh a chak ber nih theih nual ka tum a ni,” a ti bawk.

Rossi chuan, “Jerez-ah khan chuti takin ka tlan tha lo char charin ka hria a, practice te, qualifying velah te leh intlansiak tak takah pawh khan ka duh angin ka tlan thei lo a. Intlansiakah phei kha chuan a tir lam atangin Jack Miller vangin ka buai chho a, lehpel turin ka bike khan a tlin si lo a ni,” a ti.