Tunlai hian MC Mary Kom chungchang a ri nasa viau mai a, Olympic qualifier khel thei turin Nikhat Zareen chuan a cho a, Mary Kom chuan Nikhat Zareen chu a hlauh loh thu a sawi.
Nikhat Zareen chuan Mary Kom nen trial bout neih a duh thu a sawi nasa hle a, Boxing Federation of India (BFI) in vawi ruk ngawt world champion lo ni tawh Mary Ko chu India ram aiawh tura thlan an tum tih thu an sawi hnua hetianga rawn tawng chhuak hi a ni.
Mary Kom chuan, “Nikhat Zareen hmachhawn hi ka hlau reng reng lo a. Olympic qualifier khel thei tura trial neihnaah kan inhnek a nih ngat chuan ka tan chuan Nikhat hneh chu a nih ve dan tur hrim hrim leh thil danglam tak a ni lo ang,” a ti.
Russia rama World Championships khelh zawh chiaha bronze medal latu Mary Kom chuan, “BFI chuan thutlukna an siam a, kei chuan dan ka thlak danglam thei lo a, boxing ring chhunga chet bak tih theih ka nei lo,” a ti.
“Thutlukna eng ang pawh siam se, an tih ang ang chu kei chuan ka zawm mai tur a ni a. Nikhat Zareen nena inhnek hi ka hlau hauh lo a, trial hi neih tur a nih pawhin pawi tihna ka nei hek lo,” a ti bawk.
A sawi zelnaah, “Nikhat hi SAF Games atang tawh khan vawi eng emaw zat ka lo hneh ve tawh a, heti chung hian min la cho zel mai a. Eng ber hi nge tih a tum a, eng rilru nge a put le? BFI chuan Olympics-ah hian tuin nge medal dawng thei tih chu an hre chiang alawm,” a ti.
“Mi hian min itsik thei viau mai a. A hma pawhin hetiang boruak hi ka lo tawng tawh thin a, thil thar pawh niin ka hre tawh lo a. Boxing ring chhungah chetziain thil chu kan tifel mai tur a ni a, chu chu thil awm dan tur pawh a ni. BFI hian khawi khawiah emaw min tir chhuak thin a, kan tha tak tak a ni tih lantir tur chuan gold medal nen kir leh theih a pawimawh ber,” tiin a sawi.
Mary Kom chuan, “Zareen hi ka dodal hran miah lo a, nakin zelah chuan a la tha chho viau a ni thei. Tawn hriat te han ngah chho phawt se, inelna sangah te han tel chho nual se a zia zel mai ang. Kei chu kum 20 vel zet ka lo inhnek ve tawh a, mi cho mai hi chu thil awlsam tak a ni a, chet that erawh a harsa fo thin,” a ti.
Mipa lampangah chuan BFI hian World Championships medal la theite kha chu China rama Olympic qualifier neih tura tel turin an ti nghal a. Hmeichhe lampangah thung chuan gold medal leh silver medal late chauh chu kum thar February thlaa Olympic qualifier-ah hian tel thei nghal turin an ti thung a ni.