21 Oct 2018 07:57

inkhel

Nike leh Sharapova an inthen dawn hnai

Maria Sharapova leh Nike te chu kum 20 zet an lo inzawm tawh hnuah an inthen dawn hnai a nih hmel hle a. Hmeichhe infiammi zinga hausa ber a nih theih phahna chuan Sharapova hi an zawmpui tawh dawn lo a nih hmel hle.

Kum 20 kalta atang khan Nike leh Maria Sharapova te chuan inremna thuthlung an ziak a, infiammite thawmhnaw lampang siamtu company lian hian kum 20 chhung chu Sharapova hi kum tin £10 million bawr vel an pe ziah a. He inremna an neih avang hian Russian star hi khawvela hmeichhe infiammi zingah chuan a hausa ber a nih theih phah a ni.

American company Nike nen contract an ziah lai hian Maria Sharapova hi kum 11 chauh a la ni a. Inremna an ziah hnu hian Sharapova hian Grand Slam title 5 chu a la tawh a, tunah chuan kum 31-a upa a ni tawh a, kumin kum tawp hian an contract ziah hi a tawp tawh dawn a ni.

Russian star Sharapova chuan a thiante bulah Nike nen contract an ziah chu kumin kum tawp ruala a tawp tawh dawn thu sawiin, contract thar an ziah belh a rin tawh loh thu a sawi.

2016 khan Sharapova hi damdawi hman phal loh a hman avangin an hrem a, hemi tum hian Nike pawhin an inremna angin engmah an kalpui duh lo a. Mahse, a hnua anti-doping tribunal in Maria hian a duh reng vanga dan bawhchhia a ni lo tih thutlukna an siam avangin contract chu an kalpui chhunzawm leh chauh a ni.

Damdawi hman phal loh a hman avang hian Maria chu thla 15 chhung an hrem a, April 2017 khan tennis a khel tha leh chiah a, Stuttgart-ah a tel ve leh tan a. Hemi hnu hi chuan tun hma kha a pha thei tawh lo hle a, a uaithla lam a nihna a lang chho ve tan a ni.

Sharapova hian Nike nen contract ziah leh chu beiseiawm tawh lo nia a ngaih thu a sawi tawh a, hetih rual hian mi thenkhat chuan Adidas nen an inrem theih an rin thu an sawi a. Adidas hian US Open champion Naomi Osaka chu contract ziahpui an tum mek nia an sawi avangin Sharapova tan hian hmun a awm lo thei bawk.

An sawi dan chuan Adidas hian Japanese nula Naomi Osaka hi an company in hmeichhe infiammi tana contract an tawktarh tawh zawng zawnga sang ber ziahpui an tum a, Naomi hi kum khata £6.5 million hlawhtir tumin an dawr a ni.