Chelsea no.9 thar Tammy Abraham chuan England tan nge Nigeria tan a khelh dawn a la sawi thei lova, tiang lam a ngaihtuah lutuk rih lo niin a lang.

Chelsea striker hi England-a piang ni mahse a thlahtu te Nigerian an nih avangin African ram tan pawh hian a inkhel thei a, Youth team lamah erawh England tan vek a inlan thung.

England senior team-ah Abraham hi koh a ni tawh nghe nghe a, England senior team tan hian vawi hnih inlan tawh bawk mahse friendly match ve ve a nih avangin a duh chuan Nigeria tana khelh a la thlang thei.

Hmun hrang hranga loan-a an chhuah tir hnuah Chelsea chuan kum 21 mi Abraham hi tun season-ah an kawl a, jersey no.9 pe in Chelsea striker rinrawl ber a ni mek. Chelsea manager Frank Lampard chuan Abraham hi a ringtawka,  Abraham pawh hian rintlak a nih zia khelmual chhungah a lan tir.

Premier League game nga khelh tawh a ni a, Abraham hian goal sarih khung tawhin, an game hnuhnung berah hattrick a siam a, tunah hian Sergio Aguero nen Premier League top-scorer an ni mek.

Abraham chuan Nigeria emaw England tana khelh chungchang sawiin, “Hemi chungchang hi sawi chhuah a ni fo tawh a, mahse keichuan kha lamah rilru ka la pe ve lutuk lo. A hun a lo thlen chuan a lo thleng mai dawn a, tunah chuan Chelsea-ah chiah rilru ka pe rih a, goal khung zela hnehna chan zel phawt hi ka duh.

“Eng nge thleng dawn a sawi theih lova, England tan nge Nigeria tan ka khelh ang tih pawh ka la hre lo. Sawi tawh angin Chelsea-ah chiah rilru ka pe riha , Wolves lakah kan khel tha in hnehna chan kha a awmsam lova, keimahni pawh kan lawm a ni,” a ti.