Sir Jim Ratcliffe chu Manchester United neitu zinga a tel ve tak avangin, France rama a club tho Nice leh United chuan champions league a rualin an khel thei dawn lo.
OGC Nice hi Ratcliffe-a ta tho a ni a, anni hi Ligue 1-ah 5-na an ni mek. Manchester United chu Premier League table-ah 6-na an ni mek bawk a, United pawh hian Champions League khelh tumin a tawp thlengin an bei dawn.
Hetih lai hian UEFA danah chuan, club neitu inang te chuan a rualin competition pakhatah an inlan thei lo ang tih a ni a.
Tlemin rules tihdanglam hret a ni a, club neitu inang te chu a rualin Europe-ah an inlan thei ang a, hetih lai hian competition pakhatah erawh an tel rual thei lo ang tih a ni leh.
Heti a nih hi chuan, pakhatin Champions League lo khel ta se, pakhat chuan Europa League emaw Europa Conference League emaw an khel thei dawn tihna a nih chu.
Nice leh Manchester United te hi Champions League khel phak dinhmunah lo ding ta ve ve se, league table-a a sang zawkin Champions League an khel ang a, a hniam zawkin Europa League an khel dawn tihna a ni.
February thla khan Ratcliffe chuan, "Club neitu pakhat ten a rualin Champions League an khel thei lo ang tih dan awm mah se, hei hi thu tawp a ni bur lo.
"A tihdan kawng kan dap mai dawn a ni, rules hi a inthlak ve reng a, a dum leh a var ang a ni bik lo a nia. UEFA pawh kan dawr mai ang," tiin a lo sawi tawh a nih kha.
Nice hi Ligue 1-ah 5-na an ni mek a, 4-na Lille nen an point hmuh zat a inang. Ligue 1 atanga UCL khel theihna chu top 3 thleng a ni a, 3-na ni mek Monaco chu Nice hian point 3-in an phak lo mek.
Manchester United hi Premier League-ah 6-na an ni mek a, top 4-a awm mek Aston Villa chu point 9-in an phak lo a, hetih lai hian game khatin United an khel tlem zawk.
Sawmna : Website advertisement hi min click sak ve thin turin kan sawm a che u.
United hi top 3-a an awm phak a rinawm chiah loh a, Nice leh United te hi Champions League khel thei dinhmunah ding ta ve ve se, table-a a hnufum zawk chu United an ni dawn tihna a ni a, Europa League lama an inlan a ngaih dawn hmel a ni.