UFC Women's Flyweight Champion Nicco Montano leh Valentina Shevchenko te chu UFC 228-ah an inbei dawn nia a lang tawha, Montano-i hian weight cut-ah harsatna a tawh chhoh tak avangin thulh(cancel) a ngai ta thung a, hemi hnu lawk hian UFC President Dana White-a chuan flyweight champion anih atanga a hlihsak thu a puang zui nghal.

UFC 228 co-main event-ah Montano leh Shevchenko an inbei ngei dawn niin a lang a, Montano-i hian weight cut-ah harsatna a tawk chho a, damdawi inah hial enkawl ngaiin a awm zuia, weight paih tumin tan la viau mahse; a taksa hriselna nghawng thei thil anih avangjn UFC medical team lam chuan khel thei anih loh thu an hriattir.

Montano-i hi Ultimate Fighter atanga rawn lar chho niin; vawi 3 fight a chak hnuah title fight a nei thei hlauh maia, nikum December thla khan TUF 26 Finale-ah Roxanne Modafferi hnehin UFC hmeichhe flyweight champion hmasa ber a ni zui ta nghe nghe.

UFC President Dana White-a chuan, " Shevchenko leh Montano inbei hmuh tur a awm dawn ta lo hi a pawi hle a, Shevchenko-i hian title fight neih a chak tawh tih ka hria a, remchang hmasa berah hmeichhe flyweight fighter a hmachhawn anga, a chak zawk chu champion thar an ni zui ang," a ti.

Shevchenko-i hi flyweight division-ah a khelh hmasak ber atangin boruak a nei lian nghal hle a, Priscila Cachoeira hnehin title fight nei chho turin a dinhmun a siam tha nghal hle. Amah hi Bantamweight title challenger hlui anih mai bakah UFC Women's Bantamweight Champion hlui Holly Holm-i pawh a lo hneh tawh.

Flyweight title an hlihsak tak Montano-i hian champion anih atangin taksa hrisel lohna a nei chho a, title fight pawh a nei thei lawklo. Title fight a neih hmasa ber turah weight cut-ah harsatna a tawh chhoh tak avangin champion anih na pawh hlihsak a ngai ta si. Montano-i hian UFC a luhchilh hma hian MMA organisation King of the Cage leh HD MMA lamah te a lo khel tawh thin a ni