16 Oct 2020 11:57

bakteaJr.

Mizo tlangval

​Ni thum chhung mak tiin ka khat: Swiatek

French Open women’s singles champion Iga Swiatek chuan a champion mai chu awih har a la ti hle a, ni thum chhung mak tiin a khat niin a insawi.

Swiatek hian French Open khelh zawh takah khan final-ah Sofia Kenin hnehin a champion a, tournament chhung zawngin set pakhat mah a hloh lo.

Kum 19 Swiatek chuan, “Ni thum chhung chu mak tiin ka khata, ka rilru sukthlek dan hi ka hrilh fiah thei lo che u, a chhan chu kei ngei pawhin ka hrethiam lo.

“Ka nun hi a inthlak danglam hlawk a ni bera, ngaia neih tumin ka bei chho mek. Poland ah hian mi thar ang maiin ka kira, tunah chuan ka lar ve deuh tawh.

“Ka thiltawn te ka hmachhawn dan pawh a tha thawkhat viauin ka hria a, Naomi Osaka in min rawn bia a, harsatna ka neih phawt chuan thurawn min pe thei reng tih min rawn hrilh. Final zawh hnu lawk khan social media-ah kan inbe nghala, min support viau pawn ka hria a, a lawmawm hle a ni,” tiin BBC a hrilh.

Kum 2018 khan khan Swiatek khan Wimbledon-ah junior girls title a la a, kum hnih a liam leh meuh chuan a Grand Slam title hmasa ber a la a, a tawpna a nih loh ngei pawh a rinawm hle.

Sawi zelin, “Grand Slam palia champion vek leh Olympic gold medal lak hi a hma atangin ka chak tawh thina, mahse ka tan chuan dream mai mai niin ka hre thin. Tunah erawh French Open ka la ta a, ka tan thil hla lutuk niin a ka hre ta lo,” a ti bawk.

Swiatek hi nikum khan high school atangin a graduate-a, University te zawma psychology zir pawh duh mahse hun a nei dawn ta meuh lo niin a lang.

“French Open hma khan kum hnih khat vel awla, tennis lama hma ka sawn dan en phawt ka rilruka, mahse tunah chuan Poland-ah ka lar ve deuh ta sia, celebrity ang deuh te pawh ka ni ve dawn pawh a ni theia, hun ka nei dawn ta lo hlein ka hria,” tiin Swiatek chuan a sawi.

Celebrity nih chu tha a hriat leh hriat loh zawhna chhangin, Swiatek chuan, “Tunah chuan engkim mai hi hriatthiam har ka la ti a, mahse celebrity ni tura bei ka ni a, Poland-ah hian tennis lama midang fuih phur thei nih ka duh ber a ni,” a ti.

Swiatek hi world no.54 ni chungin French Open-ah hian a champion a, Poland mi Grand Slam title la thei hmasa ber a ni.