RB Leipzig striker tunlai luck em em Timo Werner chuan release clause euro maktaduai 55 (pound maktaduai 49) a nei meka, hemi pek tlak theih hun hi ni 12 hnuah a tawp dawn.

English club Chelsea leh Liverpool nen Werner hi sawizawm a ni nasa hle a, anni hian pound maktaduai 50 tling lova an lei duh dawn chuan tun thla ni 15 a ral hma ngeiin he release clause hi an pek a ngai dawn.

Werner-a release clause hi June ni 15 hmaa pek tlak a nih loh chuan Leipzig lam hian a man an chhiar thei tawh dawna, an goal thun khawl hi an chhiar to dawn tih chu chiang a ni.

Chanchinbu mite tarlan danin Werner hian Liverpool pan a duh bera, mahse Liverpool lam hian tun ang dinhmunah chuan a release clause hi an pe tla ngam rih lo.

Chelsea an rawn lang ve leh a, anni hian pound maktaduai 49 an pek tlak ngam mai a rinawm viaua, season tharah Werner hi Chelsea player a ni lovang tih a sawi theih loh.

Werner duh tu te zingah Manchester United hming pawh a ri fo a, anni bakah hian Real Madrid leh Bayern Munich te hming pawh lam rik ni thinin, Bayern erawh Werner hian a zawm a rinawm loh a ni.