12 Jul 2019 12:13

bakteaJr.

Mizo tlangval

​Neymar thlaktu tur Sane?

Paris Saint-Germain chuan an player manto Neymar an chan a nih chuan a thlaktu atan Premier League champion Manchester City winger Leroy Sane chu lakluh an tum dawn niin Sport chanchinbu chuan a ziak.

Khawvela footballer manto ber Neymar chuan PSG a chhuahsan duh ngei niin a langa, pre-season training pawh zawm lovin, PSG lam pawhin an lungawina tawka dawrtu an awm chuan Neymar chu a chhuah theih thu an lo sawi tawh bawk.

PSG hian Neymar thlaktu an dap nghal ni pawhin a langa, Manchester City lama duh anga khel tam lo German winger Sane chu thlem chhuah an tum dawn niin a lang.

Kum 23 mi Sane hian City-ah contract thar a ziak duh rih lova, a chhuah duh thu eng mah la sawi lo mahse Bayern Munich chuan an dawr renga, tunah PSG hming a rawn ri ring chho mek.

Sane hi German club Schalke academy chhuak a ni a, kum 2016 khan City chuan Schalke atang hian pound maktaduai 37 bawr velin an laluta, kum nga daih contract an ziahpui.

City-ah khel rim chho viau mahse season liamta khan duh angin a khel tam lova, Bernardo Silva leh Raheem Sterling-te a nek chhuak zo meuh lo. Schalke-a a awm lai hian PSG chuan lakluh an lo tum tawh a, mahse Sane hian Etihad Sadium pan a thlang.

City hian Sane hi a chhuah an duh lova, contract thar ziahpui theih pawh an la inbeisei viau. Sane hian chhuah a duh chuan a man a tlawm dawn lova, a man hi pound maktaduai 90 bawr vel tal a nih a rinawm a ni.