Neymar leh Mbappe te hian Ballon d’Or an la dawng ang: Buffon

15th October 2019, 12:10AM

Gianluigi Buffon chuan a teammate hlui Neymar Jr leh Kylian Mbappe te chuan nakin zelah Ballon d’Or an la dawng ngeia a rin thu a sawi.

Italian goalkeeper Gianluigi Buffon chuan Paris Saint-Germain lamah season khat chu hun a hmang a, French club-a a khelhpui thin pahnih Neymar leh Mbappe te chu a dah sang hle a. Anni pahnih hi Lionel Messi leh Cristiano Ronaldo thar an nih tur thu sawiin, mi mal chawimawina sang pawh la dawng ve ve turah a dah a ni.

Buffon chuan, “Paris Saint-Germain-ah khan player tha em em mai, nakina Ballon d’Or la dawng thei pahnih ka khelhpui thei hlauh mai a. Ka sawite hi Neymar leh Kylian Mbappe te an ni a, an thiam dan hi sawi fiah thiam a harsa zawk a ni,” a ti.

“Anni pahnih hi PSG ka pan chhan pakhat chu a ni a. Kylian hi player tha chungchuang tak mai niin, kum 10 chhungin Ballon d’Or vawi 5 dawn a duh thu a sawi a nih chuan a dawng thei ngei ang a. Amahah hian engkim a innghat vek a ni,” a ti bawk.

Kylian Mbappe hian khawvela footballer ropui zawng zawngin an duh em em, World Cup champion medal chu a nei der tawh a. Hetiang medal hi Cristiano Ronaldo, Lionel Messi leh Neymar te pawhin neih ve theih ngei an duh hle a, Mbappe chuan a kawl fel tawh tlat a ni.

Ligue 1 season tan niin goal a thun nghal a, kum 20-a upa Mbappe chu inhliam vangin Euro 2020 qualifying-a Iceland leh Turkey nen an inkhelh dawnin France squad-ah a tel theih loh phah a ni.

Mbappe leh Neymar te hi tun season chhungin a rualin vawi khat chiah an la inkhel a, Paris Saint-Germain leh Bordeaux an inkhelh tumin substitute bench atanga lut Mbappe chuan Neymar-a goal thun tur, an chakna goal ni bawk chu a siamsak a ni.

Copyright © inkhel.com 2024. All rights reserved.