13 Aug 2019 07:04

inkhel

Neymar hian Real hi UCL title a lakpui thei ang: Hagi

Gheorghe Hagi chuan Real Madrid-in Neymar an la lut thei a nih ngat chuan tun season-ah UEFA Champions League la thei tura beiseiawm ber an nih theih thu a sawi.

Brazilian superstar Neymar chu tun hnaiah La Liga club lian Real Madrid nen an sawi zawm nasa hle a. Paris Saint-Germain pawhin an forward hi hralh chhuah mai an hreh vak tawh lo niin a ngaih theih a. Pathiannia Ligue 1 season tannaa 3-0 a Nimes an hneh tum pawhin an khelhtir ve lo a ni.

Paris Saint-Germain sporting director Leonardo chuan khawvela player man to ber, 2017 a Barcelona atanga €222 million zeta an lei Neymar chuan Paris khawpui a chhuahsan tep tawh niin a sawi a ni.

Real Madrid chuan season tan hmain Chelsea atangin Eden Hazard an la lut a, 1990 atanga 1992 thlenga Los Blancos tana khel thin Gheorghe Hagi chuan Madrid khaw club lian hian Hazard nei tawh tho mahse Neymar an lak belh a nih phei chuan 2019-20 season chhungin eng team mahin an dang theia a rin loh thu a sawi chhuak.

Hagi chuan, “Real Madrid hian Hazard an la tawh a, Neymar an lak belh leh thei a nih phei chuan an tawrhhlelhawm tawh dawn viau a. Chutiang a nih theih phawt chuan awlsam takin an chak fo thei tawh dawn a, UEFA Champions League title pawh an la leh thei ngei ngei ang,” a ti.

“Neymar hi an la thei ta a nih pawhin Zinedine Zidane chuan Eden Hazard nen chhawr dan a thiam em em dawn a. Rinhlelh rual lohin a taka a thleng thei a nih ngat chuan coach tana duhthusam a tih loh theih loh ang a. Khelmuala tha taka che thei turin fuih phur thiam a pawimawh ber tawh dawn a ni,” a ti bawk.

Neymar chuan Barcelona chhuahsana Paris khawpui a pan hnuah beisei a pha vak lo hle a, Hagi chuan Spain rama a kir leh a nih ngat chuan a hmaa a boruak tha tak ang kha a neih leh theih nghal a rin thu a sawi chhuak.

“A changin Neymar hi a che tha a, a chang chuan chet chhiat deuh tum te pawh a awm ve bawk a. Hetiang hi ni thin mahse player hlutna erawh chu a pangngai reng a. Neymar hian eng team-ah pawh khel se, a khelhna team tana tangkai takin a khel thei vek ang,” tiin Hagi chuan a sawi.