Khawvela footballer manto ber Neymar chuan tun lai hian nitin deuh thaw thawm a nei a, a khelh mekna Paris Saint-Germain chhuahsanin khawi club nge a zawm dawn sawi a la harsa hle.

Neymar hian tun nipui lai khan PSG atanga chhuah a ngiata, a hunah training tur pawhin a kir duh lo. Neymar hi PSG lam chuan heti anga a awm hnu lawk hian an lungawina tawka dawrtu an awm phawt chuan chhuah tir an hreh bik loh thu an sawi zui ve nghala, hemi ni atang hian Neymar hian thawm a la nei ziah a tih theih awm e.

Kum 2017 khan Neymar hian Barcelona chhuahsan a duh thu a sawi a, mahse Barca hian hralh an tum lo hle. PSG chuan Neymar-a release clause pound maktaduai 200 (euro maktaduai 222) an pe tla ta a, hetah erawh Barca tan sawi theih a awm lova, Neymar hian a duhna lam a pan ta ngei bawk.

Neymar hi khawvela footballer manto ber a ni chiang hle a, a man hi a to fal hle. PSG-in a manah pound maktaduai 200 lai sengin kar khatah pound maktaduai khat dawn an hlawh tir laiin Neymar hian kum hnih hnu lawkah PSG a chhuahsan duh leh nghal hi, PSG supporter te pawhin an hrethiam lova, mi tam zawk a thawng a tih loh theih loh.

An player tha ber ni mahse PSG fan-te pawhin Neymar hi an iai tawh hle a, an stadium chhungah Neymar duh lohna lam thil hmuh tur a tam chho hle bawk.

PSG supporter-te hi an thiamawm hle a, heti taka manto leh hlawhsang ni chungin Neymar hian kum hnih chauh a cham hnuah chhuah a ngiat mai hi a demawmna chen a awm a, a nihna takah PSG-in a tana sum an sen zat ngaihtuah chuan chhuah ngiat ngam tur a nilo pawh ti ila min hnialtu an tam kher lovang.

Player manto satliah a ni lova, khawvela footballer manto ber a ni a, a chungah rinna an nghah avangin PSG chuan pound maktaduai 200 lai an seng ngama, a hlawh pawh an pe sang vet vet viau a ni.

Neymar hi player tha a ni tih chu hai rual a ni lova, sawi tam pawh a ngai lo. Mahse a mah duhsaktu club tan a rinawm hleithei lova, Europe-a a mah hruai luttu Barcelona pawh a thu in a lo chhuahsan lui tawh a ni.