14 Aug 2019 09:39

bakteaJr.

Mizo tlangval

​Neymar-a manah Rakitic leh Coutinho?

Barcelona chuan Paris Saint-Germain chu Neymar-a chungchangah inbiakna an kalpui leh meka, tun kar tir khan Barca hotute chu PSG hotute hmu turin Paris khawpuiah an thlawk lut.

Barcelona hian kum 2017-a PSG hnena euro maktaduai 222 an hralh Neymar hi lei let leh dan an ngaihtuah meka, PSG hian Neymar-a manah euro maktaduai 222 an sen zat bawk hi an phut niin chanchinbu mite chuan an tarlang.

Barcelona hian tun nipui chhungin sum an seng nual tawha, manto takin Atletico Madrid atangin French forward Antoine Griezmann an lalut tawh bawk. Barcelona hian Neymar hi duh hle mahse a manah euro maktaduai 222 em chu an thehchhuak ngam tawh rih lova,hemi avang hian lakluh dan kawng dang an dap mek.

Barcelona hian Neymar lakluh nan euro maktaduai 100 bakah an player pahnih Philippe Coutinho leh Ivan Rakitic-te chu PSG lama kaltir an phal niin tarlan a ni a, hei zet erawh PSG hian an hnial ngam dawn em a la hriat loh.

Neymar hian PSG chhuahsan a duh a, tunah hian Barcelona bakah Barca hmelma lianber Real Madrid chuan Neymar hi an dawr ve mek niin sawi a tam hle bawka, Spanish heavyweight pahnihin kum 27 mi hi an inchuh dawn niin a lang.

Barcelona hian an midfielder Philippe Coutinho chu chhuahtir dan an zawng meka, Neymar-a mana kal tir chu a remchang hle dawn pawhin a langa, mahse an midfielder ui lai Rakitic a tel loh chuan PSG hian an dawrna hi an pawm a rinawm loh a ni.