​Newcastle lakah Chelsea an him hram

27th September 2015, 06:09AM

St James' Park-ah Newcastle United chuan champion lai Chelsea an mikhual a, Newcastle hian si hnih faiin hma an hruai ren rawn tawh, mahse hun tawp dawn minute 10 chhungin Chelsea chuan an si phurh an rul a, 2-2 in an inhnehtawk ta a ni.

Newcastlel tan Perez chuan first half tawp dawnah goal hmahruai a khung a, second half 60th mins-ah Wijnaldum chuan Newcastle goal hnihna a tauh lut. Chelsea an chak lo leh mai dawn emaw tih laiin Ramires chuan hun tawp dawn minute 10 la awmin goal ropui box pawn atangin a khung, hun tawp dawn minute 4 la awmin Willian chuan free kick atangin mawi takin Chelsea si phurh a rul a, 2-2 in an inhnehtawk ta a ni.

Newcastle 2-2 Chelsea

(Pérez 42′ Wijnaldum 60′) (Ramires 79′ Willian 86′)

PLAYER RATINGS (data source : eurosport)

Newcastle: Krul 7, Janmaat 6, Mbemba 5, Coloccini 5, Mbabu 7, Sissoko 6, Anita 6, Colback 6, Wijnaldum 8, Perez 8, Mitrovic 6.

Subs: Obertan 5, Toney 5, de Jong 4.

Chelsea: Begovic 6, Ivanovic 5, Zouma 5, Cahill 5, Azpilicueta 6, Matic 5, Fabregas 6, Pedro 5, Oscar 6, Hazard 5, Remy 5.

Subs: Ramires 8, Willian 7, Falcao 5.

Hrem a nih avangin Mourinho chuan a striker Diego Costa chu a chhawr thei lova, first half inkhel hmuhnawm takah mual neitu Newcastle an khel tha zawk. First half tawp dawn 42nd mins-ah Perez chuan box chhungah ball mawi takin a khawih a, Ivanovic leh Zouma karah mawi takin a pet goal chhunzawm, si khat faiin half time a nih chuan Newcastle chuan hma an hruai a.

Second half 60th mins-ah Perez corner pet tha tak chu Wijnaldum chuan chiang set sawtin a tauh lut. Fabregas khan Wijnaldum kha a mark a, mahse a thlah zalen ta a, tibuaitu awm miah lovin Wijnaldum hian a tauh goal ta a ni. Mourinho chuan a chak lo tak ngial dawn nia a hriat avangin substitution a siam a.

Matic lachhuakin Mourinho chuan Willian a dah lut a, Oscar la chhuakin Ramires a dah lut, tin striker Remy aiah Falcao a dah lut bawk a. Hei hian game nasa takin a rawn sawi danglam a, Ramires chuan goal ropui a khung chhunzawm bawk.79th mins-ah 25 yards atangin kawh em emin, top corner-ah Ramires chuan a pet goal ta, Krul chuan a ban phak lo chiang kher mai.

Hun tawp dawn minute 4 la awmin mual veilam sir atanga Willian free kick chu a thlawk lut ta a, Ramires khan a tauh fuh tep a, Krul khan an tauh dawn emaw tiin chu chu a lo chang tawp a, mahse tuman an tawk ta si lo, 2-2 in an inhnehtawk ta a ni. He match-ah hian hun tawp dawn lamah Chelsea hian chance an nei nawk a, Fabregas ball pek tha lutuk Pedro-a'n a pet goal loh te kha a mak zawk a ni.

First half-ah Sissoko pawhin chance tha tak a nei a, Perez pet Begovic lo dante pawh kha tha tak a ni. Chak phu zawk sawi a har hle, dinhmun derthawnga ding Steve McClaren khan a naute chak pui a tum ruh hle a, mahse Mourinho-a'n team a siksawi tak avang khan goal hnih an chhuah leh ta kan ti thei awm e. Tun season-ah Newcastle hian hneh an la nei ve lova, table-ah 19-na an ni mek a, Chelsea pawh a mawng lamah an la awm cheu a, table-ah 15 na an ni mek a ni.

Copyright © inkhel.com 2024. All rights reserved.