Newcastle United chuan Mainz atangin Japanese striker Yoshinori Muto chu an la fel ta a. Yoshinori Muto hian work permit a neih veleh Newcastle hian an la zui nghal.

Mainz leh Newcastle United te chu tun kar tirah khan Japanese striker chungchangah hian an inrem tawh a, mahse Home Office lamah work permit hi dil leh a ngaih avangin an inlei fel thei rih lo a. Kum 26-a upa Muto hian work permit a hmuh hnuah Newcastle hian £10 million in an lei ta a. Yoshinori Muto hi FIFA World Cup-ah khan a che chhe lem lo hle a, Japan chu round of 16 a luhpui thei a ni.

Yoshinori Muto chuan, “Newcastle United player ka ni thei hi ka lawm khawp mai a, fans te hmaa inkhelh hun ka nghakhlel tawh a. Japanese player zingah he club-a lut hmasa ber ka ni a, hetianga club lian ka zawm thei hi a ropui ka ti a, inchhuanna tham a tling khawp mai,” a ti.

A sawi zelnaah, “Helai hmuna ka rawn kal chhan, result tha tak tak neih ka tum dawn a. Tha taka khelh ka duh dawn a, theihtawp chhuahin ka khel ang a, Newcastle United chanchinah ka hming hi reh thei tawh lo tura dah ka tum ang,” a ti bawk.

Newcastle manager Rafael Benitez chuan, “Yoshinori Muto kan lalut thei hi ka lawm khawp mai a. Hun eng emaw chen chu kan lo thlithlai tawh a, a thatna hi kan hmu chiang bawk a, lakluh ngei kan duh phah a ni,” a ti a.

“A tha thatna te, a thiamna te, a taimakna te hi kan team tihchakna leh hmasawnna atan a hman tangkai kan beisei a, season tharah phei chuan nasa taka hma kan sawn ngei kan ring tlat a ni,” a ti bawk.

Muto hian 2015 khan FC Tokyo atangin Mainz chu £2.5 million in a zawm a, Bundesliga game 66 khelin goal 20 chu a thun hman a, European football khawvelah a zahpuiawm lo hle a ni tih a lantir a.

Japan tan vawi 25 a khel tawh a, goal 2 chu a thun tawh a. Russia rama World Cup khelh zawh takah khan Poland nen an inkhel dawnin bul a tan a ni.

Newcastle chuan player an lei thar ta nual a, Muto hi player an lak thar pangana niin, Tyneside tlar hma lamah Ayoze Perez leh Joselu te nen hmun chan tumin an inel dawn a ni.