Yoane Wissa man chungchangah Newcastle United leh Brentford te chuan transfer deadline day-ah inremna an nei a, Wissa man hi £55million lai a ni dawn a ni.

Newcastle United hian Wissa manah hian £50million an pe dawn a, nakin hunah £55million-in a pung thei dawn. Tun nipui bazarah hian Magpies chuan a man chanve an pe phawt ang a, nakkum nipui bazar inhawn hunah a man chanve dang an pe leh dawn a ni.

Tin, kum 28 chungchangah hian Brentford chuan sell-on clause ziah tel an phut a, hei hi inremnaah an telh ta a, Newcastle chuan an leina zat aia toa Wissa an hralh leh a nih chuan, an hlep atangin Brentford chuan 25% an la ve dawn a ni.

Liverpool chuan £125million-in Newcastle United striker Alexander Isak an lei dawn a, sum lamah Magpies hian harsatna an nei lo. Hei vang hian Brentford forward hi man to tak pawhin an lei ngam ta a ni.

Newcastle hian Wissa hi vawi khat mai an dawr lo a, a tawpah chuan inremna an nei thei ta a, Wissa an lak hma chiah hian Newcastle chuan Stuttgart atangin Nick Woltemade chu club record transfer fee €75million (£65m; $87.6m) laiin an lei a, hetah hian add-ons (plus €5m) a tel nghe nghe.

Tun Premier League match thum khelh tawhah Wissa chu Brentford squad-ah a tel ziah a, mahse a chhuah mai theih avangin chhawr a ni lo a, Brentford tan hian season liamta Premier League-ah goal 19 lai a khung a ni.