Nilaini zan khan Newcastle United chuan 4-1 laiin Europe club lian Paris Saint-Germain an hneh a, English club hi tun season UCL Group of Death an tih Group F-ah hmahruaitu an ni ta vang mai.

Magpies hi PSG, AC Milan leh Borussia Dortmund te nen Group F-ah an awm ho a, Milan leh Dortmund te goal awm loa an inhnehtawk avangin Newcastle United chuan point 4 neiin Group F hma an hruai ta a ni.

St James’ Park-a inkhel hmuhnawm takah Newcastle United tan Miguel Almiron, Fabian Schar leh local star pahnih Dan Burn leh Sean Longstaff te chuan goal an khung a, Manchester United defender hlui Rio Ferdinand chuan Newastle United khelh dan a fak hle.

"Coach-in game plan tha tak a siam a, chutiang chuan an khel tluan thei. Mual khawi hmunah pawh khan player tin kha an che tha vek.

"An game khelh dan kha goal chhuah hlauhawm tak a ni a, na takin an nawr a, mahse an hlawhtling ta a ni.

"An fan te pawh khan fak an phu tak zet, theihtawpin a tir atanga a tawp thlengin an lo au a.

"Player te an tawhrimna leh huaisenna te, an thiamna te kha fak an phu a, chak kha an phu tak zet a ni," tiin Rio Ferdinand chuan a sawi.

Kum 20 zet hnuah Magpies hi Champions League-ah an kir leh a, team tha nia kan ngaih PSG lakah 4-1 laiin an chak. PSG team-ah khan Kylian Mbappe leh Dembele te an awm, game thlak danglam thei player tha tak tak PSG-ah khan awm mah se, Eddie Howe khan Plan B a hmang lo, Plan A angin an khel tluan.

Tun season UCL Group Stage draw neih a nih tum khan, Group F-a PSG, Milan leh Dortmund te nena an han awm ho chiah kha chu, Newcastle United hi che nawi ber tur anga ngai kha football fans zingah an tam hle.

An game hmasa berah Milan an tlawh a, goal awm loin an inhnehtawk. An game hnihnaah PSG an hneh, October ni 26-ah Dortmund an mikhual leh dawn a ni.

Premier League lamah season bul an tan tha tawk lo, game 7 atangin vawi 4 hnehna an chang a, vawi 3 an tlawm. Point 12 neiin Premier League table-ah 8-na an ni mek.

Hetih lai hian competition hrang hranga an game hnuhnung 4-ah hnehna an chang vek a, club lian Manchester City leh PSG te pawh an hneh zingah hian an tel a. Tun Pathianni lo awm turah hian Premier League match-ah West Ham an tlawh dawn a ni.