23 Mar 2019 01:51

inkhel

Nets hneh lotu Lakers tan playoff beisei theih a ni tawh lo

Los Angeles Lakers chu Brooklyn Nets chuan 111-106 in an hneh a, Lakers hian NBA playoff an khel thei dawn lo a. Superstar LeBron James chuan 2005 hnua a vawi khatna atan playoff hi a khel pha dawn ta lo a ni.

Vawi 4 ngawt MVP lo ni tawh LeBron James chuan a zawnin NBA finals a lo khel tawh a, mahse a kal tluang lai hi tihtawp a ni a, Lakers chuan playoff an khel pha dawn lo a, a zawna season 6 chhung playoff an khelh theih lohna tur a ni.

LeBron James chuan, “Kan tan season hautak zet mai a ni a, kan duh dan chu a ni bik hauh lo a. Kum tluanin thil duhawm lo tak tak kan tawng chho a, hremna te leh inhliam avang tein duh angin kan khel fuh thei lo nasa a, hei hi kan tuar ta a ni,” a ti.

“Tuna kan chet fuh loh avang hian indawm kun nghal ngawih ngawih kher lo ila, a hma aia tha zawka che thei tura tan kan lak a pawimawh ber. Playoff hi thil chiang sa a ni ngai lo reng reng a, theihtawp chhuaha hemi khel thei tura beih hi kan tih tur a ni,” a ti bawk.

James hian point 25 a score a, assist 14 neiin rebound 9 a la bawk a, heti chung hian Nets lakah Lakers chu a chakpui zo ta chuang lo a. NBA best player hian postseason a thlen zawh loh hnuhnung ber chu 2004-05 kha niin, Cleveland Cavaliers-a season hnih a awm tumin a ni.

Staples Center Arena-ah James hi a inlan ve thei a, a hmain a inhliam vangin game thum chu khel thei loin a chawl tawh a. Nets nen an inkhelh lai hian fourth quarter-ah second 22 chauh a awm tawh tihin ball chu basket lamah a tlanpui a, hetah hian a tlu a, mahse thil pawi erawh a thlleng lo hlauh a ni.

Joe Harris chuan point 26 a score a, Lakers player hlui D’Angelo Russell chuan point 21 a score bakah assist 13 a nei bawk a, Nets chu a zawnin vawi hnih an chakpui ta chiah a, playoff khel turin beiseina an la nei sang hle a ni.

Lakers tan JaVale McGee chuan point 33 a thun a, rebound 20 a lak bakah shot block 6 a nei bawk a, an team-ah chuan point score hnem ber a ni.

Inkhelh zawhah LeBron James chuan, “Inkhelh lai khan ka tlu chiang khawp mai a, mahse naktuk lamah chuan ka dam ve leh mai ka beisei a. Tunah chuan playoff khelh beisei theih a ni ta lo a, coaching staff te titipui a tulin ka hria a. Nakin zelah chuan a tam thei ang ber ka khelh theih ka beisei hle a ni,” a ti.