Liverpool defender Virgil Van Dijk chu a ram Netherlands tan fehchhuak mek mahse a inhnukdawk tih Dutch Football Association chuan an sawi a, tun kar liam chhunga Liverpool player ram tana fehchhuak inhnukdawk leh pangana a ni.

Van Dijk hi a inhliam vang niin a lang lova, mimal thil avanga inhnukdawk a ni tih Dutch FA hian an tarlanga, Euro Qualifiers inkhela Netherlands-in Amsterdam-a Estonia an lo mikhual hunah Reds defender hi chhawr theihin a awm dawn lo.

Dutch FA hian an captain inhnuhdawh chungchangah chhan dang an ziak lang lova, mimal thil avanga inhnukdawk a nih thu leh Estonia lakah chhawr theiha a awm loh tur thu bak an tarlang lo.

Netherlands-in an game hnuhnung bera Northern Ireland an inhnehtawkpui tum pawhin Van Dijk hi an captain a ni a, mahse tunkar Thawhlehnia Johan Cruyff Arena-a an inkhelh hunah Van Dijk lo midang an captain dawn tihna a ni.

Netherlands hi Euro 2020 khel turin an inpet tling tawh a, kum 2014 hnuah a vawi khat nan tournament lian tham an khelh leh vawi khatna tur a ni nghe nghe.

Dutch FA chuan an captain kum 28 mi Van Dijk a khelh loh tur chungchangah thuchhuah siamin, “National team coach Ronald Koeman chuan Thawhlehnia Estonia kan hmachhawn hunah Virgil Van Dijk a chhawr thei dawn lova, Dutch national team captain hi mimal thil avangin a inhnukdawka, training camp pawh a chhuahsan fel tawh a ni,” an ti.