Inrinni zan khan Netherlands chuan si khat faiin Republic of Ireland an hneh a, Manchester United striker hlui Wout Weghorst chuan goal awmchhun a khung.

de Vrij-a ball pek tha tak chu Weghorst hian halfway line velah dawngin chak takin goal lamah a tlanpui a, goal bul a thlen chuan near post-ah kawh lutukin a chhuih goal.

Euro Qualifiers Group B-ah Netherlands hian khelh 7 atangin point 15 an hlawhchhuak a, nakkum Euro an khel ve thei dawn ta a ni.

Group B hmahruaitu France chuan 14-0 laiin Gibraltar an sawp, European ram competition-a inhnehna nasa ber a ni a, Gibraltar hi team tha lo an ni bawk nen, minute 18-na lekah Santos hnawhchhuah a ni a, hei vang hian si an phur ta teuh a ni.

Kum 17 leh ni 11 mi Warren Zaire-Emery chuan France tan a goal hmasa ber a khung a, France tana goal khung hnem ber kum 37 mi Giroud pawhin goal hnih a khung leh bawk.

Mbappe chuan hattrick a siam a, a goal pakhat phei chu hla tak atangin a ni a, goalkeeper rawn up a hmu a, hla tak atangin a chhuih goal.

Coman leh Giroud te chuan goal hnih ve ve an khung a, Dembele, Rabiot, Fofana, Clauss leh Warren Zaire-Emery ten goal khat teuh an khung a, Santos chuan an lamah a ti goal bawk a ni.

France tana goal khung hnem ber Giroud hian hattrick a siam teuh hle, a goal pakhat chu offside avangin pawmsak a ni lo. France goal hnuhnung ber a khung dan erawh a mawi hle, a bicycle kick goal mawi hle a ni. Giroud hian France tan game 128 a khel tawh a, goal 56 a khung tling tawh a ni.