Neroca FC chuan Imphal khawpuia Khuman Lampak Main Stadium-ah Indian Arrows an lo mikhual a, an mikhualte hi 3-0 in an lo hneh zui a ni.
Mual neitu tan hian Katsumi Yusa, Felix Chidi leh Malemnganba Meitei te chuan goal khat theuh an thun a, goal difference-ah an that zawk avangin Minverva Pubjab chu an lehpel a, a chak lo zawk Indian Arrows erawh chu point 3 hmuin a mawngah an la awm zel thung.
Manuel Retamero chuan 2-1 a Shillong Lajong an hneh tuma a khelhtirte bawk chu bul a tantir a, thlak danglam a nei lo a. Minerva Punjab laka an tlawm tum ang bawkin Floyd Pinto chuan Indian Arrows chu a khelhtir ve bawk a ni.
Inkhelh tan atangin Indian Arrows chu a bet zawkah an tang nghal a, heti chung hian shot on target nei hmasa zawk chu an ni tho a. Inkhelh tan atanga minute 9-ah Rahim Ali chuan Neroca goal-ah chuan ball a pet a, mahse Lalit Thapa chuan awlsam deuhin a lo man thung.
Minute 15-ah a thlengtu lam chuan goal thun theihna hun tha tak mai an nei a, Malem chuan a sir atangin Arrows goal lamah ball a vawrh phei a, hei hi Chidi chuan thun tumin a lo chang a, mahse Arrows defender Narender chuan a lo dang chat thei hlauh a ni.
Arrows hian hun tha an nei nual a, mahse goal erawh an thun thei lem lo a. Neroca pawhin goal thun tumin beihpui thlak thin mahse an tum an tihlawhtling thei mai bik lo a.
Minute 29-ah Subash Singh chuan Katsumi Yusa chu ball a pe phei a, Yusa hian Arrows defender te chet fuh loh nangin Prabsukhan Gill man hman lohin goal a thun a, Neroca chu hma a hruaipui ta hlauh a ni.
Hemi hnu hian an innawr chhunzawm leh a, mahse half time thleng chuan goal dang a awm belh ta rih lo a, Neroca chuan 1-0 in hma an hruai a ni.
Second half an khel leh a, a tir atangin Neroca bawk chuan an nawr chho leh nghal a. Minute 54-ah Felix Chidi chuan Gill a bum a, hemi hnu hian Nigerian star chuan Arrows goalkeeper man theih lohin goal-ah chuan a thun a, Neroca chu 2-0 in hma a hruaipui a.
Hun tawp hma deuh, minute 84-ah Williams chuan Arrows goal lamah ball a vawrh phei a, hei hi Malemnganba Meitei chuan a lo thun a, hun tawpah Neroca hi 3-0 in an chak theih phah a ni.