NECS Cup Semifinal lut a hriat ta

23rd March 2019, 10:03PM

NECS Cup 2019 Inter Village Football Tournament chu March ni 23, Inrinni khan AR Lammualah quarterfinal hnuhnung zawk khelh a ni a, inkhel vawi hnih awmin Lengpui leh Armed Veng chuan an khingpui ve ve hnehin semifinal an lut a, semifinal lut a hriat kim ta a ni.

Semifinal lut te:
1.Republic Veng 2. Ramhlun South 3. Lengpui 4. Armed Veng

Semifinal hi first leg leh second leg khelh tur a ni a, first leg hi March ni 25, Thawhtanni chawhma dar 11:00-ah Ramhlun South leh Republic Veng ten an khel ang a, chawhnu dar 1:00-ah Lengpui leh Armed Veng ten an khel leh ang.

11:00 AM Lengpui 3-1 Chanmari West
(F Lalremsanga 29', Joe Zoherliana 64', Clement Zonunhlua 90+2' (P) (Lalremmawia 90+3')

Quarterfinal inkhel hmasa zawk Lengpui chuan 3-1 a Chanmari West hnehin semifinal an lut. Goal lut te hi first half leh second half a lut an ni a, Lengpui tan F Lalremsanga, Joe Zoherliana leh Clement Zonunhlua te chuan goal khat theuh an khung a, Chanmari West tan Lalremmawia chuan goal khat a khung ve bawk.

First half-ah goal khat a lut a, Lengpui chuan inkhel thunun zawkin minute 29-ah F Lalremsanga chuan an hmahruaina goal a khung. Second half-ah goal thum a luh belh leh bawk. Lengpui bawk chungnung zawkah tangin minute 64-ah Joe Zoherliana chuan an goal hnihna a khung.

Goal luh belh lo in Lengpui chuan 2-0 in hnehna an chang dawn emaw tih hnu hun tawp dawn Added time-ah goal hnih a lut leh a, Lengpui chuan penalty an hlawh chhuak a, he penalty hi Clement Zonunhlua chuan goal-ah chantirin an goal thumna a khung.

Huntawp dawn tak takah Chanmari West tan Lalremmawia chuan goal khung mahse, an siphurh sut turin hunin a daih tawh lo a, Lengpui chuan 3-1 in hnehna an chang ta a ni.

01:00 PM Chanmari 1 - 2 Armed Veng
(Lalnunzama 42') (Lalfakzuala 20', Lalbiakhlua 120')

Inkhel hnuhnung zawk Armed Veng leh Chanmari te hunpangngaiah 1-1 in an inhneh tawk a, extra time khelh leh a ni a,  Armed Veng chuan Lalbiakhlua goal khat hmangin 2-1 in hnehna an chang ta a ni.

Armed Veng tan Lalfakzuala leh Lalbiakhlua chuan goal khat ve ve an khung a, Chanmari tan Lalnunzama chuan goal khat a khung ve bawk.

Team pahnih te an intluk tawk hle a, goal hmasa ber hi inkhel tan a tang a, minute 20-ah Armed Veng tan Lalfakzual chuan a khung a, first half huntawp dawn minute 3 ala awmin Chanmari tan Lalnunzama chuan an siphurh sutna goal a khung ve bawk. Hun pangngaiah chak zawk awmlo in 1-1 in an inhneh tawk ta a ni.

Extra time khelh zui a ni a, minute 120-ah Armed Veng chuan an hun tha neih hmang tangkaiin Lalbiakhlua chuan an goal hnihna a khung chu Chanmari chuan huntawp thlengin an siphurh hi an sut thei tawh lo a, Armed Veng chuan 2-1 in hnehna an chang ta a ni.

March ni 25, Thawhtanni Semi Final 1st Leg Fixtures
11:00 AM Ramhlun South Vrs Republic Veng
01:00 PM Lengpui Vrs Armed Veng

LPS 1 ah Live a pek chhuah ani ang.

Copyright © inkhel.com 2024. All rights reserved.