NECS Cup 2019 Inter Village Football Tournament chu March ni 22, Zirtawpni khan AR Lammualah quarterfinal khelh tan a ni a, inkhel vawi hnih awmin Republic Veng leh Ramhlun South chuan an khingpui ve ve hnehin semifinal an lut

March ni 23, Inrinniah Quarterfinal khelh chhunzawm tur a ni a, inkhel vawi hnih a awm leh ang a, chawhma dar 11:00-ah Lengpui leh Chanmari West ten an khel ang a, chawhnu dar 1:00-ah Chanmari leh Armed Veng ten an khel leh ang a, semifinal lut a hriat kim tawh ang.

11:00 AM Republic Veng 3-0 Hualngohmun

(F.Lalrinpuia 13', Lalhmingmawia 61', (OG), Lalnunzira 74')

Quarterfinal inkhel hmasa zawk Republic Veng chuan sithum fai a, Hualngohmun hnehin semifinal an lut. Goal lut te hi first half leh second half-a lut an ni a, Republic Veng tan F.Lalrinpuia leh Lalnunzira chuan goal khat ve ve an khung a, Lalhmingmawia chuan an lamah a ti lut hlauh bawk.

First half-ah goal khat a lut a, goal hmasa ber hi first half tan a tang a minute 13-ah Republic Veng tan F Lalrinpuia (Valpuia) chuan hnai tak atangin chiang zetin a khung a ni. Second half-ah goal hnih a luth belh a,  Republic veng tan Lalhmingmawia chuan minute 61-ah an lamah a ti lut hlauh a, minute 74-ah Lalnunzira chuan an goal thumna a khung zui leh a, Republic Veng chuan 3-0 in hnehna an chang zui ta a ni.

01:00 PM Ramhlun South 2 - 1 Chhinga Veng
(Malsawmfela 44', 109') (Lalbiaknia Royte 43')

Inkhel hnuhnungah champion rinkai ve ve Ramhlun South leh Chhinga Veng te hun pangngaiah 1-1 a an inhneh tawk hnuah extra time khelh a ni a, Ramhlun South chuan Malsawmfela goal khat hmangin hnehna an chang ta a ni.

Inkhel tan a ni a, team pahnih te an in tluk tawk hle a, goal lut awmlo in first half an hmang zo dawn emaw tih hnu huntawp dawn minute 2 ala awmin Chhinga Veng tan Lalbiaknia Royte chuan an hmahruaina goal a khung chu minute 1 aral hmain Ramhlun South tan Malsawmfela chuan an siphurh a rul zui nghal zat thung.

Second half-ah team pahnih ten goal an thun belh thei lo a, hunpangngaiah 1-1 in an inhneh tawk rih a, extra time an khel zui leh a, minute 109-ah Ramhlun South tan Malsawmfela chuan goal khungin 2-1 in hmaanhruai a, Chhinga Veng chuan an siphurh hi sut tumin nawr let bawk mahse, huntawp thlengin an siphurh an sut thei tawh lo a, Ramhlun South chuan 2-1 in hnehna an chang zui ta a ni.