29 Mar 2019 07:49

Inkhel

Mizo Sports Website hmasa ber

​NECS CUP 2019 Champions Armed Veng

NECS Cup 2019 Inter Village Football Tournament final-ah Armed Veng chuan si khat faiin Republic Veng an hneh a, a vawi hnih nan Armed Veng hi NECS Cup ah an champion ta a ni. Final-ah hian Lalmuanzova chuan 116 mins-ah goal awmchhun a khung a, champion team hian Rs 17,00,00/ leh Trophy dawngin pahnihna hian Rs 80,000/- an dawng bawk.

He tournament-a best player chu Republic Veng player K Lalnunzama niin Chanmari forward Lalnunzama chu top scorer a ni bawk. Final match-ah hian 23 mins-ah Republic Veng hmatawng Valpuia hnawhchhuah a ni a, hun pangngaiah goal awm lovin an inhnehtawk a, extra time thleng khelh niin Armed Veng an chak ta a ni.

Armed Veng 1-0 Republic Veng (AET)

(Lalmuanzova 116')

Red Card : F. Lalrinpuia 23' (Republic Veng)

Armed Veng XI: Lalfakzuala, R Lalhriatzuala, Lallawmpuia Hnamte, Lalchhhanhima Sailo, Lalmuanzova, Simon Lalruatkima, Lalbiakhlua, Vanlalduatsanga, Saidingliana, Andrew Lalhmingliana, C Lalchhuanawma

Republic Veng XI: K Lalnunzama, RS Lallawmzuala, F Lalrinpuia, Lalmuanawma, Vanlalngenga, Malsawmdawngliana, Lalnunzira, Vanlalfela, Lalruatfela, Lalhriatpuia, Paul Ramfangzauva.

Champion lai petchhuaktu Republic Veng leh Lengpui lehthaltu Armed Vengte inhmachhawn hi a tir atangin a hmuhnawm nghal hle. Inkhelh tan hmain final programme hman a ni a, player te darkar chanve chuang ni sa hnuaiah ding. Tin, tournament-ah hi chuan chawlh hahdamna hun a tam thin loh avangin final-ah player te an chau tawh thin. Chuti chung chuan player-ten veng tan theih tawp an chhuah, a tir atangin an innawr tawn zak zak, an tha a la tha zek zek kher mai.

Minute 20 hma lamah Republic Vengin chance vawi hnih an nei, Zirtea ball lakluh tha lutuk chu a pet goal dawn emaw tih laiin a pet out hlauh mai, Valpuia shot tha zet pawh Armed Veng goalkeeper Andrew-a'n tha zetin a lo dan sak bawk. Minute 23 an khel tling a, referee chuan Republic Veng striker Valpuia a hnawtchhuak tlat mai.

Valpuia hi hnunglam atanga tackle a ni a, ball erawh chhuhsak a ni. Referee-in foul a ham loh avangin a lawm lo hle, referee kha a ankhum nge a nek lui tih a hriat chiah loh, referee chuan direct red card a phawrh. Red card phawrh nan chuan a ho hle niin thenkhatin an ngai, match official te pawh an inhmukhawm rap rap a, darkar chanve chuang Valpuia red card avang hian an inrawnkhawm, match a khaihlak.

Referee chuan a thutlukna a kal tlangpui ta nge nge a, kim lovin Republic Veng chu 23 mins atangin an khel tan ta. Kim lo zawk ni mahse Republic Veng an khel tha chhunzawm zel, dinglam atanga Zirtea cross tha lutuk chu free takin MS Chawngthu chuan a tauh goal dawn emaw tih laiin chhe takin a tauh out, hma hruai theihna chance tha tak chu a ni chiang kher mai.

Republic Vengte hi a kim lo zawk an nihna first half tawp dawn lamah a lang, Armed Vengin an nawr na zel, Hlutea chuan through ball tha zet a dawng a, Republic Veng goalkeeper RS-a rawn up chu Hlutea chuan a pet khum, a goal ngei dawn nia a lan laiin defender Muanawma chuan goal line atangin a clear a, Republic Veng a chhanhim.

Second half-ah erawh chance a tam lem lo, Republic Veng lamin goal khung theihna chance tha tak an nei, Hriatpuia chuan goalkeeper chiah a hmachhawn tawh, Andrew-a'n Armed Veng a chhanhim a, Republic Veng hian a kim lo zawk an nih zia an hrechiang, an tlarhnung an veng uluk hle, chutih laiin counter attack hmangin an nawr na thin hle. Minute 90 chhungin a tam zawk an nihna Armed Veng chuan an hmang tangkai thei ta lo, goal awm lovin an inhnehtawk a, extra time khelh a ni ta a.

Republic Veng an thawkrim, an tlan nasa, hetih lai hian a tlem zawk an ni tawh si. Extra time-ah a tlem zawk an nihna a lang chho ta zel a. First ball apiang Armed Veng lamin an chang chho ta. Extra time first half-ah Armed Veng lamin half chance an nei, box pawn atangin Hlutea'n kawh mar takin a pet, mahse a over hlauh mai.

Extra time half time a ni a, khua a thim ta. Flood light tih nun chhung minute 25 chuang match a khaihlak leh. Second half tan a ni a, a tlem zawk Republic Veng an bet tial tial, 116 mins-ah Lalmuanzova chuan box chhungah ball tha taka lalutin goalkeeper kapkarah a pet, goal zawnah a kal, a lumlut tep, defender-in clear tumin pet mahse a thei ta lo, a goal ta. Hemi hnu hian Armed Veng chuan goal post vawi hnih lai a zawnin an pet per, hun a tawp chhunzawm a, si khat faiin Armed Veng chuan hnehna an chang a, NECS Cup-ah a vawi hnih nan an champion ta a ni.

Valpuia khan direct red card a phu em?

Valpuia khan red card a hmuh hma deuh chiahin hnung lam atanga tackle-in ball a laksak, refree-in foul a ham. Rei an khelh hmain chutiang deuh chiah chuan ball an chhuhsak ve, mahse Armed Veng defender te tackle-na erawh a sir deuh atangin a ni a, tha takin ball an laksak bawk. Referee-in foul hamna chiah a ngai lo, a play on a. Hetah hian Valpuia a thinur hle, referee kha engtiang takin nge a ankhum tih erawh TV atanga entu leh inkhel entute chuan kan hre lo.

Senior player a ni a, a tih loh tawp tur a ti. Chutih laiin final a ni a, referee-in direct red card a phawrh mai erawh pawn lam atanga an inbakkaih dan hre hleithei lo tan chuan a ho khawp mai. Referee kha a thin a ram deuh emaw chu aw tih tur niin a lang, chutih laiin Mizorama referee tha ber pakhat a ni a, report kimchang referee-in a pe a nih loh chuan kotlang atang chuan sawi thui vak tur a vang hle.

Final nawi ber a ni hial awm e

YMA Football Tournament leh Veng leh Veng inelna Inter Village football tournament-te hi Mizoramah chuan football inelna ropui ber; Mizoram World Cup kan tih mai thin kha an ni a. Final-ah tu pawh intum mahse a hmuhnawm em em ziah. Kumin final erawh game hmuhnawm em em mahse organising lamah kum dang a phak lo hle. Promo poster-a a intarlan angin Inkhelh tan hun dar 2:00 PM niin a lang. Chutih laiin dar 2:50 PM ah tan a ni chauh a. Player-te inkhelh tan hmain thusawi leh solo lai zawng mual chhungah din tir an ni a, minute 30 dawn ni sa hnuaiah an ding. Inkhelh tan a ni a, minute 23 an khelh tlinin red card chungchangah buaina a awm, official te inrawnkhawm chhung darkar chanve chawlh a ni leh a. Extra time half time-ah flood light on chhung minute 30 dawn chawlh a ni leh bawk a. Final khelh chhung a rei kher mai.

Inkhel thlirna

Republic Veng hi kumin chu an tha em em, champion pawh an inbeisei. Final-ah pawh hian team tha zawk niin an lang. Kimlo chunga an khel pawh Armed Veng tan hmachhawn harsa tak an ni tih a chiang. Extra time-ah erawh an thain a daih tawh lova, vawi hnih lai goal chhuah thei an ni, vawi khat an chhuah ta a nih kha. Red card chungchang avangin buaina a chhuah rin a ni a, Republic Veng an chak lo a nih vaih chuan referee khawih an tum ngei a rinawm sa. Buaina hi chhuak lo se duhthusam a ni a, buaina chhuak tur pawh a ven theih chiang mai. Mahse kumin final erawh Football-a thil duhawm loh ber pakhat a thleng leh ta a, a pawi khawp mai.