26 Mar 2015 06:03

Inkhel

Mizo Sports Website hmasa ber

​NECS CUP 2015 : Ramhlun South leh Dinthar quarter final-ah inhlangkai

Aizawl District Football Association(ADFA) leh tt Royte Group te buatsaih NECS Cup 2015 Inter Village Football Tournament chu March ni 25, 2015 atang khan Round of 16 khelh tan a ni a, Nilaini hian Ramhlun South leh Dinthar te chuan quarter final an lut a ni.

Match hmasa zawk hi 12:30 PM-a khelh tan a ni a, Ramhlun South chuan si khat faiin Kanan an hneh a. He match hi a hmuhnawm khawp mai. Goal awmchhun hi 55 mins-a Zico Zoremsanga khung niin, Kanan hian penalty an hlawh chhuak a, mahse goal-ah an chantir thei ta lo a ni.

Inkhel hnuhnung zawkah Dinthar chuan 6-1 laiin Ramhlun Vengthar an sawp a. Dinthar tan hian Mizoram Police forward Lalnunmawia chuan hattrick a siam a, Lalsawmtlunga chuan goal hnih khungin, Lalropuia chuan goal khat a khung ve bawk a ni.

25th March, 2015 Results :

Ramhlun South 1-0 Kanan

Zico Zoremsanga 55'

Dinthar 6-1 Ramhlun Vengthar

(Lalnunmawia 7', 28', 59', Lalsawmtluanga 51', 88', Lalropuia 25') (Ramdinmawia 5')

March ni 26, 2015 hian AR Ground-ah Round of 16 khelh chhunzawm a ni anga, Khatla leh Chhinga Vengte chuan dar 12:30 PM-ah an khel anga, a hnuhnung zawkah Armed Veng South leh Farkawn ten an khel ve leh bawk ang.

Organiser te lamin fans thut dan tur ruahmanna fel tak an siam a, March ni 26 match-ah hian Khatla supporter te chu K Kawla Stand lamah an thu anga, Chhinga Veng Supporter te chu Zomuanthanga Stand lamah an thu ang. Match hnuhnung zawk Armed Veng South Supporter te chu K Kawla Stand lamah an thu anga, Farkawn Supporter te Zomuanthanga Stand lamah an thu thung dawn a ni.