2021 NBA Finals ah rin kai ber ni lem lo team pahnihin title an inchuh dawn a, championship title inchuh turte hi Phoenix Suns leh Milwaukee Bucks te an ni a. Bucks hian 1973-74 season hnua Finals an khelh leh hmasak ber tur a ni dawn a, vawi khat chiah league title hi an la thei a, 1971 kumah khan niin, an hmaa ding tur Phoenix Suns phei chu title la la ve miah lo an ni.
NBA Finals khel turte chu title lak lama insawithei tur an awm lo hle a, hetih lai hian team thenkhat chuan title hi vawi eng emaw zat an lo la tawh a. Nikum lama champion LA Lakers chu tun thlenga Finals khel hnem thei ber niin, vawi 32 zet chu an lo inlan tawh a. Lakers leh LeBron James te chu kum thar lamah title lak belh tumin an rawn inlar leh dawn a. Anni hi tun dinhmunah chuan NBA championship title kawl hnem ber niin, an elpui Boston Celtics nen title an lak zat hi a inang chiah a ni.
LA Lakers leh Boston Celtics te chuan NBA championship title vawi 17 ve ve an la tawh a, anni team pahnih te hi title lak hnem lamah chuan record chelh mektu an ni a. NBA league tih tirh atanga tun thlengin Lakers leh Celtics te chu team hlawhtling ber tia sawi theih an ni mek a. A tir lamah phei chuan Boston Celtics hi team langsar ber an ni chho reng thin a, 1960 bawr chho velah ringawt khan NBA title vawi 9 ngawt an la thei a, tun hnuah pawh team tha ber pawl hi an la ni thei reng tho a ni.
Boston Celtics chuan player lar tak tak an nei chho ve deuh reng thin a, Bob Cousy leh Bill Russell te hun laiin championship title hi an la hnem hle a. 1981 thleng khan Celtics chuan NBA title 14 an la thei a, khatiang hun lai khan LA Lakers chuan title 7 chauh an la thei rih a ni.
A hnu lamah Lakers chu an che tha chho a, Michael Jordan te an inlan chhoh hnu, Kobe Bryant te leh Shaquille O’Neal te ho an tel ve hnuah khan title chu an la chho nual a, title lak hnem lamah pawh Celtics an um pha thei ve ta a ni.
2000 chhoah khan Lakers chuan championship title 6 an la a, 2009 leh 2010 ah te khan a zawnin title hi an la nghe nghe a. Boston Celtics chuan title an la khat ta angreng hle a, an champion hnuhnun ber chu 2007-08 NBA season ah khan niin, Lakers nen Finals series an khel a. Kum 29 mi Kobe Bryant telna Lakers chu an chak zo ta lo a, he series-ah hian Celtics chu 4-2 in an chak a ni.
He mi season hnu chiahah hian Celtics chu an che tha zui thei ta vak lo a, Eastern Conference Finals an pal tlang thei ta lo a, LA Lakers chuan phuba lain series an khelhah 4-3 in an chak a ni.
Lakers an chak khan Celtics chu title lak hnem lamah 17-16 in an la um mek a, 2019-20 NBA seson-ah khan an hnufualna chu an thai bo a, NBA title an lak zat chu 17 ve ve a ni ta a ni.
Golden State Warriors leh Chicago Bulls te chu an hnuaiah hian awmin championship title vawi 6 ve ve an la tawh a, NBA title vawi 5 la tawh San Antonio Spurs chu an hnuaiah hian an awm ve leh bawk a ni.