NBA team lei ka duh: Manny Pacquiao

21st July 2019, 02:07AM

Manny Pacquiao chuan kum 45 a tlin thlenga inhnek zel a duh thu sawiin, inhnek a chawlhsan hunah chuan NBA team lei a duh thu a sawi.

Pacman chuan tunah pawh a la fit that thu sawiin, kum 20 mi ang vel nia a la inhriat thu a sawi a. Hetiang zel a nih chuan kum 45 a tlin thlengin boxing chu tih zel a la tum thu a sawi bawk a. Boxing ring chhunga luh a tum tawh loh hunah chuan Manny hian NBA team lei theih a duh thu a sawi bawk a ni.

Kum 40-a upa Pacquiao hian Las Vegas khawpuiah hneh loh nei lo welterweight champion Keith Thurman chu a hmachhawn dawn a. Pacman hian boxing khawvel a luhchilh hnuah professional bout 71 a khelhna chiah a ni ang.

Pacquiao chuan tun atanga kum nga hnua boxing khelh a la tum leh tum loh an zawhna chu chhangin, “Tuna ka awm dan atanga chhut hi chuan kum nga pawh ral leh mahse ka la inhnek ngei ka ring,” a ti.

“Ka taksa dinhmun ka hria a, ka rilru pawh ka chawlhtir lo a, hei vang hian ka la zuam viau a. Theihtawp ka chhuah a, thahnemngai takin ka inbuatsaih chho zel a, training camp-ah hun tha tak ka hmang chho thei a, nuam ka tiin hetiang dinhmun ka thleng thei hi a hlu pawh ka ti hle,” a ti bawk.

A sawi zelnaah, “Engmah harsatna ka neih ka hre lo a, ka fit em em a, thalai ang mai niin ka la inhria a, kum 20 vel bawr ang mai niin ka inhria a. Hei hi malsawmna tha tak, Pathian malsawmna dik tak a ni ber,” a ti.

Phillipine boxer Manny chuan, “Taksa tih fit reng hi a pawimawh berin ka hria a, insawizawi reng hi a tha a. Insawizawi hi nuam ka ti em em a, ni khat emaw, ni hnih emaw ka insawizawi loh chuan hrehawm ka ti mai thin a. Ni tin basketball ka khel ziah a, a tlangpuiin darkar li atanga darkar nga hi chu ka khel thin,” a ti.

Manny Pacquiao hian Phillipines-ah basketball league a siam a, Maharlika Pilipinas Basketball League tih a ni a. Boxing a chawlhsan hunah chuan tuna basketball league a siam mai ni tawh loin, NBA lama sum thap a duh dawn niin a sawi.

“NBA lama sum thap hi ka rilruah a lian khawp mai a, Phillipines-ah league ka siam a, a lar chho ve tawh hle a. Basketball hi ka ngaina a, league neitu ka ni ve ngei bawk a ni,” a ti.

Copyright © inkhel.com 2024. All rights reserved.