Miami Heat legend Dwyane Wade chuan NBA khawvelah a tawpna atan tel leh a tum thu sawiin, Miami Heat tan a khel leh a nih chuan NBA season 16 ah a tel tawh dawn a ni.

Vawi thum ngawt NBA champion lo ni tawh Dwyane Wade hi Heat tana khel tawh zingah chuan a chungnung chiang hle a. Heat shooting guard hi point, assist, steal leh game khelh zatah chuan tluk thei an la awm lo a ni.

Kum 36-a upa Dwyane chuan, “Ka duhtawk hmain a tawpna atan season khat chauh chu min lo tawiawm leh turin ka ngen che u a, tun hi ka season hnuhnung ber a ni tawh ang,” a ti.

“Ka theihna zawng zawng nen ka inkhel thin a, season khat chiah chu ka theihna hi ka sawm khawm leh dawn a ni,” a ti bawk.

Wade hian 2016-17 season kha a chenna khua Chicago lamah a hmang a, Bulls ah a khel a, a hnuah Miami lama a lo khelhpui tawh thin LeBron James chu Cleveland Cavaliers ah a zawm ve leh a ni.

February thla khan Wade hian Miami lam a pan leh a, Miami hi Eastern Conferene-ah pakuana an ni a, NBA play-offs an khel thei lo chiah a ni.

Wade hian 2018-19 season atan $2.4 million (£1.84 million) contract a ziah hmel a, tun kar chhungin contract hi a tifel tura beisei a ni a. Heat hian regular season-a an game hmasa ber chu October 17 hian an khel dawn a, Orlando Magic nen an inkhel dawn a ni.