Olympic champion hlui Jennifer Azzi chuan India rama NBA school vangin hun rei vak loah basketball dinhmun chuan nasa takin hma a sawn a rin thu a sawi.
Women’s National Basketball Association (WNBA) legend, tuna University of San Francisco hmeichhe basketball team head coach ni mek Jennifer Azzi chuan kum eng emaw kalta atanga NBA in India rama hma an la chho chu tha a tih thu sawiin, kum tam tak a vei hmain khawvela league lian hoah India ram basketball player te pawh hmuh tur an awm chhoh a rin thu a sawi.
Jennifer Azzi chuan, “Basketball khawvelah India hming hi a lang har tawhin ka ring lo a, Asia khawmualpui bikah phei chuan hun rei vak loah an lang chho thei ngeiin ka ring tlat a. NBA chuan India ramah sikul te an din tan a, hetiang zarah hian reiloteah mi hriatah an lang thei vatin ka ring tlat a ni,” a ti.
“A bulpui hi uluk se, a nih dan tur ang takin kalpui chho se, he infiamna hian India ramah nasa takin hma a sawn thei dawn chiang a ni,” a ti bawk.
Kum 50-a upa Jennifer Azzi hi India ramah kalin, Greater Noida-a NBA Academy ah camp a buatsaih a, heta basketball player a hmuhte chuan a lung an ti awi hle niin a sawi.
Azzi chuan, “Basketball hi India ram hmeichhiate infiamna tur tak pawh niin ka hria a. Bul tanna tur a awlsam a, mahni chauh pawhin ball a awm phawt chuan bul a tan theih a, a inpuahchah theih vek a. Infiamna ropui tak mai a ni a, ram hrang hrang huap thil a ni a. Khawvel hmun hrang hrangah basketball hian hriat a hlawh em em a ni,” a ti.
“India rama mipa naupang leh hmeichhe naupangte tan basketball khawvelah dinhmun sang taka din theihna kawng a inhawng tha hle a, tih tak taka luhchilhtute tan chuan khawvel huapa hriat hlawh theihna a ni tlat a ni,” a ti bawk.
NBA Academy a belh chian hnuah Jennifer Azzi chuan thalai an kaihhruai dan chu lungawithlak a tih thu a sawi.
“Helaiah chuan thalaite zirna an ngaipawimawh hle a ni tih ka hmu a, an chhungte pawhin an fate chu tha taka lehkha zir turin an duh a. Hetiang tak hi NBA in kan tlangaupui leh kan duhthusam a ni a. He infiamna hmanga thalaite’n zirna tha an neih theih hi kan duh ber chu a ni,” a ti.