Kum 30 mi Russell Westbrook chuan Oklahoma City Thunder chhuahsanin Houston Rockets a zawma, Rockets player Chris Paul chuan Thunder lam a zawm ve thung.
Westbrook hi NBA ngainatute chuan player tha tak a nih zia kan hre ngei anga, NBA All-Star team-ah vawi riat ngawt tel tawhin NBA scoring champion vawi hnih a ni tawh bawk.
Oklahoma City Thunder general manager Sam Presti chuan Westbrook hi Oklahoma City Thunder chanchina player pawimawh ber a nih thu hial a lo sawi tawh.
Westbrook-a’n Thunder a chhuahsan chungchang hi Presti chuan sawiin, “He team-ah hian sulhnu ropui tak a hnutchhiaha, he team mai nilo, he khawpui leh state-ah hian Russell hian sulhnu ropui tak a hnutchhiah a ni.
“Heti ang taka player tha a ni ang tih hi tu mahin kan ring pha ngai lova, Russell leh a nupui Nina-te bakah an fa pathum te leh a unaupa leh a nu leh pate hi Thunder chhungkaw zinga mi an ni reng tawh dawn a ni,” a ti.
Westbrook hi 201-17 season khan NBA 'most valuable' player atan thlan a lo ni tawh a, Olympic goal medalist niin, kum 2012 khan London-ah Olympic gold medal a lo la tawh.
Kumin April thla mai khan Westbrook hi NBA chanchina ’20-20-20’ triple-double score theih pahnihna a ni bawk.
Thunder chairman Clayton Bennett chuan Westbrook-a chungchang tlem sawi vein, “Oklahomas tana a lo tih tawh zawng zawng avang hian Russell-a chungah lawmthu kan sawi seng dawn lova, a sulhnu hnutchhiah hi a ropuiin, kan hriat sak reng tawh dawn a ni,” a ti ve bawk.