30 Apr 2019 12:31

inkhel

​NBA Playoffs: 76ers in Raptors an hneh; Nuggets in Blazers an hneh bawk

NBA Playoffs semi-final khelh chhunzawm a ni a, Eastern Conference game 2-ah game 1-a chak lo tawh Philadelphia 76ers chuan Toronto Raptors hnehin, series hi 1-1 a ni mek.

Western Conference game 1-ah Denver Nuggets chuan Portland Trail Blazers an hneh ve bawka, Nuggets chuan he series-ah hian 1-0 in hma an hruai.

Eastern Conference: Toronto Raptos 89 – 94 Philadelphia 76ers

He inkhelah hian Jimmy Butler a langsar hle a, point 30 a score bakah rebound 11 a la. 76ers hian minute ruk aia tlem khelh tur a awmin point 13 laiin hma an la hruaia, nuamsa taka an chak mai a rinawm hnuah Raptors an rawn che na. Minute khat pawh awm tawh lo tihah Raptors hian point 13-ah an intlauhna chu point khatah an pawt hniama, mahse 76ers player Joel Embiid chuan hun tawp hma lawkin 76ers lam point hmuh belh puiin 94-89 in an chak zui ta a ni.

Joel Embiid hian he inkhelah hian point 12 chauh score mahse basket pawimawh ber a khung a tih loh theih lova, Toronto lamah Kawhi Leonard langsar em em in point 35 lai a score thung.

Western Conference: Denver Nuggets 121 – 113 Portland Trail Blazers

He inkhelah hian Nuggets tan Nikola Jovic chuan a thawhhlawk hle a, point 37 lai a score a, rebound pakua la in assist paruk a nei bawk. Nuggets player Jamal Murray pawh a che tha thawkhat viau a, point 23 score-in assist pariat a nei bawk.

A tir quarter pahnihah team hnihte intum tawk angreng viau mahse Nuggets chuan third quarter an thunun a, hnehna chang zuiin Blazers lakah 1-0 in hma an hruai mek a ni.