NBA playoff khelh mekah Boston Celtics leh Cleveland Cavaliers te dinhmun a duhawm ta hle a, an khingpuite lakah 2-0 in hma an hruai ve ve.

Eastern Conference semi final Game 2-ah Boston Celtics chuan point 22 zeta an hniam hnuah Philadelphia 76ers an lehthal a, 108-103 in an chak leh thei a. Inrinni hian Game 3 chu Philadelphia khawpuiah an khel leh ang.

A tir lamah Philadelphia hian 48-26 in hma an hruai a, Celtics tan beisei tur a tam loh hmel viau a. Theihtawp chhuahin an bei let a, 76ers an tal buai ve leh thung a, a tawpah Celtics chuan an lehthal thei ta zawk a ni.

Boston tan Tatum chuan point 21 a score a, Terry Rozier pawhin point 20 a score bawk a. 76ers tan JJ Redick chuan point 23 a thun a, Robert Covington chuan point 22 thunin, Joel Embiid pawhin point 20 a thun bawk.

Inkhel dangah Cleveland Cavaliers chuan Toronto Raptors chu a vawi hnihna atan an hneh leh a, Eastern Conference semi final-ah 2-0 in hma an hruai ve ta bawk a.

LeBron James chuan point 43 zet mai a score a, Cavaliers chu 128-110 in a chakpui a, Inrinni hian Cleveland-ah Game 3 an khel leh ang.

Toronto hian first half chhung chuan an khel chhe lem lo hle a, minute 5 chhung lekin point 9 in hma an hruai hman a. Mahse Cavaliers in tan an la chho ve a, second half-ah chuan hma an rawn hruai ve leh thung a. James hian point 43 a score bakah assist 14 a nei a rebound 8 a la a. Kevin Love chuan Cavaliers tan hian point 31 a score bakah rebound 11 a la bawk.

Ben Simmons chuan first half-ah a khel tha lem lo hle a, second half-ah chuan an thuttir deuh char char nghe nghe a. T.J. McConnell chuan 76ers tan point a thawk chhuak hnem deuh ber ta a, Simmons hian point 1 chauh a score a, turnover 5 leh rating-ah -23 chauh a hmu bawk a ni.