Joel Embiid leh Ben Simmons te chet that zarah Philadelphia 76ers chuan 104-91 in Miami Heat an hneh a, NBA playoff series an khelah 4-1 in an chak.
Season hnih kaltaa game 10 chak thei 76ers hian 2012 hnua a vawi khatna atan Eastern Conference playoff second round an lut a, Milwaukee Bucks leh Boston Celtics te inkhela a chak zawk zawk an hmachhawn leh dawn a, Celtics hian 3-2 in hma an hruai mek a ni.
Wells Fago Center-a inkhel an zawh meuh chuan thawm a tha hle a, Joel Embiid chuan chuan point 19 a score bakah rebound 12 a la a, Ben Simmons chuan point 14 a score bawk a. Philadelphia chak lawm hian rapper, politician, actor leh naupang te pawh an lam suau suau mai.
Joel Embiid chuan, “Kan duh ang takin kan khel thei a, kan chet that phah a. League-ah chuan defense tha ber kan ni a, dan theih rual kan ni lo,” a ti.
Kevin Durant leh Draymond Green te chuan Golden State Warriors chu San Antonio lakah an chakpui a, Western Conference playoff second round an lut.
Durant hian point 25 a score a, Klay Thompson chuan point 24 a thun a, Draymond Green pawhin point 17 a thun bakah rebound 19 lain assist 7 a nei bawk a, playoff bikah hei aia rebound lak hnem hi a la nei ngai lo. Golden State Warriors tan vawi hnih MVP lo ni tawh Stephen Curry a la tel thei lo a, a tel lo pawhin an chak tho a ni.
Warriors hian New Orleans chu West semi final-ah an hmachhawn dawn a, kar tawpah Oracle Arena-ah an inkhel dawn a ni.
Al Horford chuan point 22 thunin rebound 14 a la bawk a, Marcus Smart chuan March thla tir atanga a vawi khatna atan a khel ve leh tawh a, Boston Celtics chuan Milwaukee Bucks chu hnehin 3-2 in hma an hruai.
Marcus Smart hi bench atanga lutin point 9 a thun bakah rebound 5 lain, assist 4 leh block 3 a nei a. A kutzungpui a zaitir hnua a khelh leh hmasak berah hian minute 25 a khel a ni.
Terry Rozier chuan point 16 a thun a, assist 5 a nei bawk a, Celtics hian anmahni tual zawlah hian first round series game 5 an khel tawh a, an la chak vek a. Game 6 chu Milwaukee mual lamah an khel ve tawh ang.
Khris Middleton chuan Bucks tan point 23 a thun a, Jabari Parker pawhin point 17 a thun bakah rebound 8 a la a. Giannis Antetokounmpo pawhin point 16 thunin rebound 10 leh assist 9 a nei bawk.