National Basketball Players Association president Chris Paul chuan NBA player te chu inkhelh leh theih hun nghakhlel takin an awm mek niin a sawi.

Kumin March thlaah khan khawvel hmun hrang hranga coronavirus a darh chhoh avangin NBA season pawh tihtawp lailawk a ni a, he hri leng vang hian khawvel pumpuiah mi 3,08,000 chuang zet chu an thih phah tawh a ni.

United States chu COVID-19 darh vanga tuar nasa ber an ni mek a, he hri leng hi an ram chhunga mi maktaduai 1.4 chuang zetin an kai tawh a, heng zinga 88,000 vel zet chu an thi tawh bawk a ni.

Oklahoma City Thunder guard Chris Paul chuan, “NBA player te hian inkhelh an chak tawh hle a, inkhelh ngam a nih huna inkhelh theih chu an thil nghahhlelh ber a ni,” a ti.

“Inkhelh kan chak tawh dan hi sawi mai theih piah lam thil a ni ber a, chak tawh tak kan ni ringawt. He league huanga player awm zawng zawng zinga a tam berte hi chuan inkhelh hi an chak vek ang,” a ti bawk.

A sawi zelnaah, “Kan inkhelh theih hun hi nghakhlel takin kan thlir mek a, chutih rual chuan dinhmun him taka kan awm phawt erawh a pawimawh hle a. Inkhel thei loa awm reng hi a ninawm duh hle a, chutih rualin kan himna hi kan ngaihpawimawh hmasak tur a ni tlat si a ni,” a ti.

“He hri leng hian engkim a tibuai mek chu a ni rih a, eng hi nge awm dan pangngai ber tih pawh sawi thiam a harsa zo tawh a. Eng pawh ni se, tunah chuan eng anga nunphung siam rem tur nge tih te kan ngaihtuah hmasak a ngai tawh a ni,” tiin Paul chuan a sawi.