LeBron James chu NBA player zinga hlawh sang ber a ni a, tun hnaia Forbes in basketball star hlawh sang an lawr chhuahah James tluktu an awm lo a ni.
Forbes in NBA player hlawh sang zual an thlan chhuahah hian Los Angeles Lakers star LeBron James chu a chungnung ber a, a hlawh hi $88.7 million niin, amah hnaih bertu chu Golden State Warriors star Stephen Curry a ni a, Curry hlawh hi $79.5 million a ni a, pahnihna dinhmun hi a zawna vawi hnih a luahna a ni.
Kum 34-a upa James hian Cleveland Cavaliers chhuahsanin Lakers nen kum li chhung atan $154 million contract an ziak a. Vawi thum ngawt NBA champion lo ni tawh hi Los Angeles khawpui a luhchilh hnuah game tina a average chu 26.7 points, 8.6 rebounds leh 7.4 assists a ni.
Golden State Warrios player dang Kevin Durant chuan $65 million hlawhin pathumna dinhmun a luah a, a hnuaiah hian $53.7 million la mek, Oklahoma City Thunder star Russell Westbrook chu a awm bawk a. Houston Rockets player James Harden chuan $47.4 million hlawhin pangana dinhmun a hauh bawk.
Houston Rockets player Chris Paul chu paruknaah awmin a hlawh hi $43.7 million a ni a, pasarihnaah $43.2 million latu, Milwaukee Bucks star Giannis Antetokounmpo chu a awm a. Portland Trailblazers player Damian Lillard chu pariatnaah awmin, a hlawh hi $41 million a ni a, pakuanaah $39.1 million hlawhin Detroit Pistons star Blake Griffin a awm a. Oklahoma City Thunder player Paul George chu Top 10 ah hian a lang pha chiah a, a hlawh hi $38.6 million a ni.
Top 10:
1. LeBron James (Los Angeles Lakers) - $88.7 million
2. Stephen Curry (Golden State Warriors) - $79.5 million
3. Kevin Durant (Golden State Warriors) - $65 million
4. Russell Westbrook (Oklahoma City Thunder) - $53.7 million
5. James Harden (Houston Rockets) - $47.4 million
6. Chris Paul (Houston Rockets) - $43.7 million
7. Giannis Antetokounmpo (Milwaukee Bucks) - $43.2 million
8. Damian Lillard (Portland Trailblazers) - $41 million
9. Blake Griffin (Detroit Pistons) - $39.1 million
10. Paul George (Oklahoma City Thunder) - $38.6 million