Joel Embiid chuan NBA khawvela player dan beh har ber a nih thu sawiin, hei hi Boston Celtics laka Philadelphia 76ers a chakpui hnua a sawi chhuah a ni.

All-Star Joel Embiid hian NBA Eastern Conference-a an hmelma team Boston Celtics nen an inkhelhin Nilaini khan Philadelphia khawpuiah 76ers chu 118-115 in a chakpui a ni.

Embiid hian Wells Fargo Center-a inkhelah hian point 37 ngawt mai a score bakah rebound 22 a la bawk a. Third quarter an khelh laiin Marcus Smart nen an inhmu thiamlo deuh zui a ni.

An inkhelh zawhah Joel Embiid chuan, “A hmasa berah chuan kan chak thei kha lawmawm ka ti khawp mai a. A hma daih atangin Boston Celtics player te chu player dangte aia min dang hneh ber turte an nih thu an sawi fo thin a, hei vang tak hian he league ropui taka player dan beh harsa ber ka nihna lantir ngei kha ka duh tlat a ni,” a ti.

Tun season chhungin 76ers hian Celtics hi an ngam thei lo hle a, an intawn hmasak pathumah a chak lo zawkah an tang nghal vek a ni.

Boston Celtics star Kyrie Irving chuan point 36 a score a, three point thun theihna hun a neih vawi 13 ah vawi 3 chauh a thun thei zui a ni.

Kyrie Irving chuan, “Tun tum zet chu hun tha ka neih ka bawhpelh nasa hle a, point score theihna tur awl deuh deuh ka hlah hnem viau a ni,” a ti.