Philadelphia 76ers All-Star Joel Embiid chuan 2018-19 season ah chuan NBA Most Valuable Player nih ngei a duh thu a sawi.

Joel Embiid hian Philadelphia tan a average chu 22.9 points leh 11 rebounds a ni a, 2011-12 hnua a vawi khatna atan 76ers chu playoff a khelhpui bawk a. Playoff second round-ah Philadelphia hian Boston Celtics an hneh ta lo a ni.

Kuminah Philadelphia hian player lar tak lakluh thar an nei miah lo a. LeBron James leh Kawhi Leonard te chu lakluh tumin theihtawp chhuah mahse an puitlin thei ta lo a. Heti chung hian center Embiid chuan pawi a tih loh thu a sawi.

“Player lar leh tha tak kan la lut kher lo a ni thei e, hei hian ka thil tum a tidanglam dawn chuang lo a. Season tan leh hmain nasa taka hma ka sawn theih nan ka inbuatsaih zel dawn a ni,” tiin a sawi.

A sawi zelnaah, “MVP nih ngei ka duh a, hetiang ni thei tur hian thahnem ngai taka ka beih a ngai dawn tih ka hria a. Tin, keimah chauh ni loin team an pawimawh em em a, kan tanrual a, kan thawhhona a that phawt chuan tih theih loh a awm lo ang,” a ti bawk.

Season tan leh hmain Philadelphia hian thawm an nei lian lo hle a, an chet fuhna ber chu guard J.J. Redick contract an ziahpui leh bakah Denver Nuggets forward Wilson Chandler an la thei chu a ni.

Embiik chuan, “Season a tawp khan mi thar lakluh chungchang kha an sawi nasa hle a. Keimah tak hi chuan khatiang titi vel kha eng vakah ka ngai lo a, keimah hian nasa taka hma ka sawn theih dan chu ka vei ber a ni a. An hming an lam ngun deuh deuhte aia tha zawk nih theih ka tum a, tunah pawh hian ka khum tawh pawh a ni thei,” tiin a sawi.

Joel Embiid hi 2017-18 khan a vawi khatna atan All-Star ah a tel a, 2014 draft-ah Philadelphia 76ers chuan an thlang a. A inhliam leh thin avangin a duh angin a inkhel tam thei lo a, NBA game 94 chauh a la khel a ni.