18 May 2019 03:42

inkhel

NBA MVP ni thei tur Giannis, Harden leh Paul George

James Harden, Giannis Antetokounmpo leh Paul George te chu NBA MVP ni thei tura chhawp chhuah an ni a, an pathum atang hian Most Valuable Player hi an thlang chhuak ang.

NBA MVP ni lai, Houston Rockets star James Harden chuan tun season chhungin league game tinah point 36.1 thun ziah ang a ni a. Milwaukee Bucks star Giannis Antetokounmpo leh Oklahoma City Thunder star Paul George te nen MVP ni thei tur hian tehfung hrang hrang hmanga an teh hnua a sang pathum an ni.

Anni pathum zingah chuan Antetokounmpo chiah hi postseason game la khel mek awm chhun a ni a, Bucks chu league-ah vawi 60 ngawt a chakpui a, hei hi tluk thei an awm lo a, amah hian game tina point 27.1 thun ziah ang a ni a, point score lamah pathumna a ni bawk a. Hei bakah hian rebound lak hnemah (12.5) parukna niin, game tina shot block (1.5) lamah chuan 10-na a ni bawk.

Paul George chuan league-ah steal (2.2) a nei hnem ber a, game tinah point 28.0 score ziah ang niin, rebound 8.2 la ziah ang a nih bakah assist 4.1 nei ziah ang a ni.

Giannis Antetokounmpo leh Paul George te hi Defensive Player of the Year ni thei tura thlan chhuah zingah pawh an tel ve ve a. A chungnung pathum zingah hian nikum lama he chawimawina lo dawng tawh, Utah Jazz star Rudy Gobert nen an pathumin an awm a ni.

League chuan chawimawina chi hrang hrang dawng thei turte hi an chhawp chhuak vek tawh a, Milwaukee Bucks leh Toronto Raptors te’n Eastern Conference finals Game 2 an khelh hmain vote an thlak fel vek a. Print media leh TV lampang mite chuan vote hi an thlak a, award dawng thei turte hi an chhawp chhuah theih phah a ni.

LA Clippers teammate Lou Williams leh Montrezl Harrell te bakah Indiana Pacers player Domantas Sabonis te chu Sixth Man ni thei tura chhawp chhuah an ni.

Dallas Mavericks player Luka Doncic leh Atlanta Hawks player Trae Young bakah Phoenix Suns No. 1 pick Deandre Ayton te chu Rookie of the Year chawimawina dawng thei tura chhawp chhuah an ni a. Denver Nuggets coach Mike Malone bakah Coach of the Year lo ni tawh ve ve, Milwaukee Bucks coach Mike Budenholzer leh LA Clippers coach Doc Rivers te chu coach tha ber ni thei tura chhawp chhuah an ni bawk.

Raptors player Pascal Siakam, Sacramento Kings player De’Aaron Fox leh Brooklyn Nets player D’Angelo Russell te chu Most Improved Player chawimawina dawng thei tura chhawp chhuah an ni a. Heng chawimawina chi hrang hrangte hi June 24 hian Los Angeles khawpuiah an sem dawn a. Hemi puala hun buatsaih hi Shaquille O’Neal chuan a kaihruai dawn a ni.