19 Sep 2020 03:49

inkhel

NBA MVP atan Giannis Antetokounmpo an thlang nawn

Giannis Antetokounmpo chu NBA Most Valuable Player atan an thlang leh a, a zawnin vawi hnih chu MVP atan hian an thlang ta.

Milwaukee Bucks star Giannis Antetokounmpo chu NBA awm tirh atangin season khat chhunga MVP leh Defensive Player of the Year chawimawina dawng kawp thei pathumna niin, 1998 khan Michael Jordan chu an lo thlang tawh a, 1994 ah Hakeem Olajuwon pawh an lo thlang kawp tawh bawk a ni.

Kum 25-a upa Antetokounmpo chuan, “Basketball player awm tawh zawng zawnga thiam ber tih theih Michael Jordan te, ka ngaihsan leh ka entawn ber pawl Hakeem Olajuwon te khan he chawimawina hi an lo dawng tawh thin a, an huanga ka awm ve thei hi ka tan chuan a ropui chiang a ni,” a ti.

‘Greek Freak’ tih hming lem an phuah Antetokounmpo hi NBA player zingah a zawna MVP atana thlan 12-na niin, Michael Jordan, Stephen Curry, LeBron James, Steve Nash, Tim Duncan, Magic Johnson, Larry Bird, Moses Malone, Kareem Abdul-Jabbar, Wilt Chamberlain leh Bill Russell te chu a zawnin an lo thlang tawh bawk a ni.

Chawimawina sang dawng mah se Giannis Antetokounmpo chuan Bucks chu playoff khelh mekah a tlakpui tawh a, Eastern Conference semi final an khelhah Miami Heat an hneh lo a. Nikumah pawh khan Eastern Conference final an khelhin Toronto an hneh lo bawk a ni.

“Hetiang taka chawimawina ropui han dawn chu a lawmawm duh khawp mai a, min thlang ta lo pawh ni se ka vui dawn miah lo a. Chutiang a nih laia min han thlang hi chu vannei ka inti tak meuh a ni,” a ti.

Antetokounmpo chuan chawimawina dawng thei tur hian vote a hmu sang fal hle a, khawvel hmun hrang hranga sports reporter te leh broadcaster te vote thlakah hian Greek basketball star hian vote 85 zet chu a hmu a ni.

Amah hnaih bertu chu Los Angeles Lakers star Lebron James niin, James hian vote 16 a hmu a, pathumna chu Houston Rockets star James Harden a ni a. March 11 thlenga an chet dan thlir chungin vote hi an thlak a, coronavirus vanga inkhel chawlh hnu chu an telh tawh lo a ni.

MVP atana an thlan nawn Giannis Antetokounmpo hi a average chu 29.5 points, 13.6 rebounds leh 5.6 assist a ni.