Indian hoopster zinga thlen san belh zel tura beiseiawm ber Amjyot Singh chuan a tum ber chu NBA a khelh a nih thu a sawi.

Nikum khan Amjyot Singh hian NBA G League team Oklahoma City Blue ah a khel a, khawvela basketball league ropui bera khelh phak tluka duh a neih loh thu a sawi a ni.

India rama 3X3 Pro Basketball League (3BL) khelh turah Amjyot hi a tel ve dawn a, hetah hian team 12 an tel dawn a, tel turte hi Chandigarh Beasts, Delhi Hoopers, Aizawl Legends, Jaipur Regals, Bangalore Machas, Kolkata Warriors, Goa Snipers, Ahmedabad Wingers, Chennai Icons, Kochi Knights, Mumbai Hustlers leh Hyderabad Ballers te an ni.

Chandigarh atanga chawr chhuak Amjyot hian 3BL chu India rama basketball dinhmun chawisangtu tur a nih a rin thu a sawi a, “3X3 basketball league hmakhua hi a eng hlein ka hria a. Olympic sport a ni a, 2020 Tokyo Games-ah pawh basketball hi a tel dawn a, hei vang hian India pawhin medal dawn theihna hun tha kan nei chiang a. Player naupang zawkte chuan theihtawp chhuah nghal a ngai a ni,” a ti.

3BL hlawhtlinna atan chuan tihlar lama chet that a ngaih thu a sawi a. “He infiamnaa pawimawh ber chu mi hriat hlawh tam a ni a, he league kaltlang hian mi tam zawk hriatah kan pho chhuak thei ngei dawn a. Nakinah chuan ram dang atangin an la rawn tel ang a, basketball boruak hi India ram chhungah chuan a kang chho vak tawh mai ang,” tiin Amjyot hian a sawi.

Amjyot Singh bakah hian Indian hoopster lar dang Satnam Singh leh Palpreet Singh Brar te pawh 3BL ah hian an tel dawn a. Ruahman lawk dan chuan India rama khawpui paruk - Aizawl, Bengaluru, Chennai, Delhi, Kolkata leh Mumbai ah te neih a ni ang.