NBA khawvelah kei aia tha an awm lo: Anthony Davis

13th October 2018, 08:10PM

Season liam taa MVP thlannaa pathumna Anthony Davis chuan NBA khawvelah chuan a chungnung ber niin a insawi a, LeBron James leh Kevin Durant te ai pawha a that zawk thu a sawi.

New Orleans Pelicans All-Star Anthony Davis hian NBA khawvelah chuan player tha ber nia a inhriat thu a sawi a, LeBron James leh Kevin Durant te chuan an tluk pha lo niin a sawi a. 2012 draft-ah khan Pelicans chuan an thlang a, hemi atang hian NBA player tha berte zingah a tel tawh a, All-Star ah pawh vawi 5 an thllang tawh a ni.

Kum 25-a upa Anthony Davis hi All-Defensive leh All-League team ah pawh vawi 3 chu an lo thlang tawh a, season hmasa khan NBA MVP thlannaah pathumna a ni bawk a, Los Angeles Lakers superstar LeBron James leh MVP atana an thlan tak James Harden te chu a tluk pha lo a ni.

LeBron James bakah Golden State Warriors star leh NBA Finals MVP vawi hnih ni thei Durant te, Houston Rockets guard Harden leh Stephen Curry te chu NBA khawvela langsar berte an la ni zel a. Mahse, Davis hian heng player te ai hian tunah chuan a tha tawh zawk niin a sawi ve thung.

Anthony Davis chuan, “Ka hmuh dan chuan kei tluka player tha hi NBA ah chuan an awm lo a, he infiamna khawvel hi ka thlak danglam dawn a. Player dangin ro an rel rei tawh a, ka hun hi a thleng ve tawh a ni,” a ti.

“James leh Kevin te hi player ropui em em mai an ni a, mahse heti chung hian khum theihna kawng ka nei ve tlat a. Anni pahnih lakah hi chuan ka danglam daih a, MVP candidate ka nih bakah Defensive Player of the Year candidate ka ni the bawk a, hei vang tak hian anni hian min tluk pha lo ka ti ve tlat a ni,” a ti bawk.

Vawi thum champion tawh James, Durant, Curry leh Harden te chuan NBA Finals an lut vek tawh a, David hi chuan Pelicans tan playoff vawi hnih chu a khel ve tawh thung a, Conference semi-final aia sang a la thleng thei lo a ni.

Copyright © inkhel.com 2024. All rights reserved.