India rama a vawi khatna atana NBA games an khelhah Indiana Pacers leh Sacramento Kings te chu an inkhel a, hetah hian Pacers chu 132-131 in an chak hram.

NBA India Games chu Mumbai khawpuian Zirtawpni khan an khel tan a, hun pangngaiah Indiana Pacers leh Sacramento Kings te chu 118-118 in an inhnehtawk a, hun pek belhah Pacers hi a vannei zawkah an tang ta a ni.

First quarter-ah Pacers player Domantas Sabonis chu a chesual a, a beng bul a kak chiang hle a. Hun tawp dawn hnaihah Kings chuan 118-115 in hma an la hruai a, Pacers chuan tlawm mai an tum lo hle a. TJ Warren chuan hun tawp hmain three-pointer a thun fuh hlauh mai a, hun tawpah an inhnehtawk theih phah a ni.

Hun pek belhah hian Pacers chu an che tha chho viau a, awlsam takin an chak dawn emaw tih mai tur a ni hman a. Amaherawhchu, Kings chu an duai bik lo hle a, a umtu zawk an nih avangin beihpui an thlak chho a. Second nga chauh a awm tawh tihin Buddy Hield chuan three-point a thun fuh lo hlauh a, Marvin Bagley chuan lay-up hmangin thun mah se Sacramento Kings chu point 1 in an chak lo ta tho a ni.

An chet fuh lai berin Sacramento Kings chuan point 17 ngawtin hma an hruai hman a, a hnuah Indiana Pacers chuan an pawtthla ve leh thung a. Second quarter tawp lamah 64-47 velin Kings chuan hma an hruai chho a, third quarter an khelh hnuah erawh Pacers chu an che fuh chho ve leh thung a ni.

TJ Warren chuan point 30 a score bakah rebound 5 a la bawk a. Domantas Sabonis chuan double double (21 points, 12 rebounds) neiin, Myles Turner chuan point 11 a score bawk a. Sacramento Kings tan Buddy Hield chuan point 28 a score a, rebound 4 a la bawk a ni.

Zaninah hian NBA India Games hi Pacers leh Kings te chuan an khel leh dawn a ni.